Shwe Dagon

Shwe Dagon

Friday, February 13, 2015

ကိုးကန့်ဒေသမှာတပ်မတော်အရာရှိစစ်သည်များကျဆုံးခဲ့ရခြင်း၏တရားခံဘယ်သူလဲ


Image result for burmese military juntaImage result for burmese military juntaImage result for burmese soldiersImage result for burmese soldiers



ကိုးကန့်ဒေသမှာတပ်မတော်အရာရှိစစ်သည်များကျဆုံးခဲ့ရခြင်း၏တရားခံဘယ်သူလဲ
စာရေးသူ။ ဗိုလ်မှူးအောင်လင်းထွဋ်
ပထမဦးစွာ မကြာသေးမှီက ကိုးကန့်ဒေသတွင် တပ်မတော်မှကျဆုံးသွားသော အရာရှိ စစ်သည်များ ၏ မိသားစုများကိုများစွာကြေကွဲဝမ်းနည်းရပါကြောင်း တင်ပြလိုပါသည်။
စာရေးသူသည် ၁၉၉၅ ခုနှစ် နှောင်းပိုင်း တပ်မတော်ထောက်လှမ်းရေးညွှန်ကြားရေးမှူးရုံး၏ စစ်ဦးစီးမှူး(ဒုတိယတန်း) တာဝန်ထမ်းဆောင်နေစဉ်တွင် ကိုးကန့်ဒေသတွင် ကိုးကန့်တိုင်ရင်းသား လက်နက်ကိုင်အဖွဲ့တွင်း ခေါင်းဆောင်များဖြစ်ကြသော ဖုန်ကြားရှင် ၊ ရန်မိုးလျံ ၊ မုန်ဆာလ တို့ အဖွဲ့တွင်း ပစ်ခတ်တိုက်ခိုက်မှုများဖြစ်ခဲ့ပါသည်။ စစ်ထောက်လှမ်းရေးအနေဖြင့်ညှိနှိုင်းပေးရန် စစ်ဦးစီးမှူး (ပထမတန်း) ဒုဗိုလ်မှူးကြီး သန်းအေး (ကွယ်လွန်) ခေါင်းဆောင်ပြီး စာရေးသူ အဖွဲ့ဝင် အနေဖြင့်ကိုးကန့်ဒေသသို့သွားရောက်ခဲ့ရပါသည်။ထိုစဉ်က လက်ရှိသမ္မတကြီးဦးသိန်းစိန် သည် စစ်ရုံးချုပ်တွင် စစ်ဦးစီးမှူးဗိုလ်မှူးကြီး တာဝန်ထမ်းဆောင်နေချိန်ဖြစ်ပါသည်။ ကိုးကန့်အဖွဲ့သည် ပထမဦးဆုံး ငြိမ်းချမ်းရေး ပြုလုပ်ခဲ့သောအဖွဲ့ဖြစ်သလို စစ်တပ်၏ အဓိကရန်သူဖြစ်သော ဗမာပြည် ကွန်မြူနစ်ပါတီ (ဗကပ) ကိုသေနတ်တစ်ချက်မဖေါက်ရဘဲ  ပြိုလဲသွားစေရန် ကူညီဆောင်ရွက်ခဲ့သော အဖွဲ့ဖြစ်၍ နိုင်ငံရေးအရ အရေးပါခဲ့ပါသည်။ ထို့ကြောင့် ဗိုလ်ချုပ်ကြီးခင်ညွန့် သည် ကို့ကန့်အဖွဲ့တွင်း ညီညွတ်ရေး ပြန်လည်ရစေရေးညှိနှိုင်းပေးရန် ဗိုလ်မှူးကြီး သန်းအေး နှင့် စာရေးသူကို ကိုးကန့်ဒေသအတွင်း သွားရောက်ရန် အမိန့်ပေးခဲ့ပါသည်။
စာရေးသူတို့အဖွဲ့သည် လာရှိုးမြို့ မှတစ်ဆင့် ကွမ်းလုံမြို့သို့ရောက်ရှိပြီး စစ်ဆင်ရေးကွပ်ကဲမှုဌါနချုပ်မှူး ဗိုလ်မှူးချုပ် သီဟသူရ တင်အောင်မြင်ဦး (ဒုသမ္မတဟောင်း) သို့ သတင်းပို့ခဲ့ပါသည်။ သတင်းပို့ပြီး နောက်တစ်ရက်ည (၁၂) နာရီခန့်တွင် စစ်သည်တစ်ဦးမှ တပ်မမှူး မှခေါ်ခိုင်းလိုက်သည်ပြော၍ စာရေးသူတို့ နှစ်ဦး တပ်မမှူးထံချက်ချင်းစလိုသတင်းပို့ခဲ့ရပါသည်။ ဗိုလ်မှူးချုပ် သီဟသူရ တင်အောင်မြင်ဦး က `ကိုသန်းအေး ချင်းရွှေဟော်မြို့ မှာတော့ ကိုမောင်မောင်သိန်း (ဗျူဟာမှူး၊ မွေးရေးဝန်ကြီးဟောင်း၊ လက်ရှိ ပြည်ခိုင်ဖြိုး အထွေထွေအတွင်းရေးမှူး) ပြဿ     နာတက်နေပြီ ကိုးကန့်အဖွဲ့က အစိုးရနဲ့သဘောတူစာချုပ်အရ သူတို့ဒေသတွင်းစစ်တပ်တွေကိုပေးမ၀င်နိုင်ဘူး လို့ပြောနေတယ် ဗိုလ်ချုပ်ကြီးမောင်အေး ကလည်းအဘကြီးအမိန့်ရပြီးပြီ ငြိမ်းချမ်းရေး ပျက်ချင်ပျက်ပေစေ မနက် (ရ) နာရီ မှ အမြောက်တွေပါသည့်စစ်ယာဉ်တန်းတွေ ၀င်ခွင့်မရရင် ပစ်ပြီးဝင်လို့ ကိုသိန်းစိန် (လက်ရှိသမ္မတကြီး)က တစ်ဆင့် ကျွန်တော်ကို အမိန့်ပေးလာတယ် အဲဒါ ၀င်ခွင့်ရအောင် ခင်ဗျားညှိ နှိုင်းပေးပါ ´ ဟုပြောခဲ့ပါသည်။ ကကကြည်း က မှာတာကတော့ ကိုးကန့်တွေကို ပြော ဒီအမြှောက်တွေ လောက်ကိုင်ကိုပို့ရတာက တရုတ်နိုင်ငံကကျူးကျော်လာရင် ခုခံဘို့အတွက်လို့ ပြောဟုပြောခိုင်းကြောင်း ညွှန်ကြားခဲ့ပါသည်။
ဗိုလ်မှူးကြီး သန်းအေး လည်း ချက်ချင်း ကကလှမ်း သို့တင်ပြခဲ့ရာ ဗိုလ်ချုပ်ကြီးခင်ညွန့် မှ `အတတ်နိုင်ဆုံးအဆင်ပြေအောင်တော့ဆောင်ရွက်ပါ ဒီလူတွေကငြိမ်းချမ်းရေးကိုတန်ဘိုး မထားချင်ဘူး ကတိက၀တ်ဆိုတာကိုလည်းထားရကောင်းမှန်းမသိကြဘူး ငါတို့ဘာမှမတတ်နိုင်ဘူး သူတို့လုပ်ချင်ရာ လုပ်ကြမှာဘဲ´  ဟုမှတ်ချက်ပြုခဲ့ပါသည်။ ဗိုလ်ချုပ်မှုးကြီးစောမောင် လက်ထက်ငြိမ်းချမ်းရေးမူမှာ လက်နက်ကိုင်ထားကြပြီး တစ်ဖက်နှင့်တစ်ဖက် ခွင့်ပြုချက်တောင်းခံပြီးသူ့နယ်မြေကိုယ့်နယ်မြေ ၀င်ရောက်ရေးဖြစ်ပါသည်။ တစ်ဦးနှင့်တစ်ဦးယုံကြည်မှုတည်ဆောက်မယ် နိုင်ငံရေးကိစ္စ ရွေးကောက်ပွဲပြီးလို့ နောင်အစိုးရ တက်ရင်ဆွေးနွေးကြ တပ်မတော် မှ ဒိုင်လူကြီးလုပ်ပေးမယ် ဆိုသည့် ကတိက၀တ်များပေးပြီး တိုင်းရင်းသားလက်နက်ကိုင်များနှင့် ငြိမ်းချမ်းရေးလုပ်ခဲ့ကြပါသည်
စာရေးသူတို့ (၂) ဦး ညတွင်းချင်း ၁၀ မိုင်ကျော်ဝေးသော တရုတ်နယ်စပ် ချင်းရွှေဟော်မြို့ကို ကွမ်းလုံမှတစ်ဆင့် ခရီးထွက်ခဲ့ရာ နံနက် (၂) နာရီ လောက်တွင်ရောက်ရှိခဲ့ပါသည်။ ချင်းရွှေဟော်မြို့ သည် ချောင်းတစ်ဘက်ကမ်းတွင် တရုတ်နိုင်ငံဖြစ်ပြီး တပ်မတော် နှင့် နယ်နမိတ်ပိုင်းခြားထားသော နေရာဖြစ်ပါသည်။ တပ်မတော် မှ ဗိုလ်မှူးကြီးမောင်မောင်သိန်း ခေါင်းဆောင်သော စစ်ဗျူဟာဌါနချုပ် သည် ကိုးကန့်လက်နက်ကိုင်များတပ်စွဲရာ တောင်ကုန်း၏ မျက်နှာချင်းဆိုင်တွင်ရှိပါသည်။ ချင်းရွှေဟော်မြို့ သည်ရွာကြီးအဆင့်လောက်သာရှိပါသည်။ စာရေးသူတို့သည် ပထမဦးစွာ ဗျူဟာမှုး ဗိုလ်မှူးကြီးမောင်မောင်သိန်း ကိုတွေ့ဆုံခဲ့ရာတွင် ၄င်းသည် ဗိုလ်မှူးကြီး သန်းအေး ကို အကူညီပေးပါရန် တောင်းတောင်းပန်ပန် နှင့် ပြောဆိုနေသည်ကို ယနေ့အချိန်ထိမျက်စေ့ထဲ မထွက်သေးပါ။ ဗိုလ်မှူးကြီး သန်းအေး သည်ကိုးကန့်နှင့်စတင်ငြိမ်းချမ်းရေးဆောင်ရွက်ချိန် ကတည်းကပါဝင်ခဲ့သူဖြစ်၍ ကိုးကန့်ခေါင်းဆောင်များ၏ ယုံကြည်လေးစားခံရသူဖြစ်လေသည်။
အဲဒီနံနက်မိုးမလင်းမှီခင်မှာဘဲ ဗိုလ်မှူးကြီး သန်းအေး သည် ကိုးကန့်စစ်ဦးစီးချုပ် ဖုန်ကြာဖူး နှင့် စီးပွါးရေးတာဝန်ခံ ကျန်တဲဝမ် တို့ကို ရှာဖွေတွေ့ဆုံပြီးဝင်ခွင့်ပြုရေးဆွေးနွေးရာတွင် ဖုန်ကြာဖူး မှ စစ်တပ် ကို ကိုးကန့်ဒေသတွင်း ၀င်ခွင့်ပေးလိုက်လျှင်ကိုးကန့်ပြည်သူလူထု၏တရားခံ နောင်တစ်ချိန်ဖြစ်လာမည် ဖြစ်၍မ၀င်ပါရန်မေတ္တာရပ်ခံခဲ့ပါသည်။ ကကကြည်း ၏  မှာကြားချက်များကိုရှင်းပြသော်လည်း လက်မခံခဲ့ပါ။ ချက်ခြင်းပင် ဗိုလ်မှူးကြီး သန်းအေး သည် စာရေးသူထံမှ ပစ္စတိုသေနတ်ကိုတောင်းပြီး ၄င်း၏လက်နက်နှင့်အတူ ဖုန်ကြာဖူး ထံအပ်နှံလိုက်ပြီး ၄င်းပြောတာကိုလက်ခံဘို့နှင့်ယုံကြည်မှုရှိအောင် မိမိတို့အသက်ကို အာမခံကြောင်း စဘော်တင်ခဲ့ပါသည်။ ထို့နောက် ၄င်းနှင့် ဖုန်ကြာဖူး တို့ (၂)ဦးချင်း တစ်နေရာတွင် မိနစ် (၃၀) လောက် ဆွေးနွေးပြောဆိုခဲ့ကြပါသည်။ ၄င်းနောက် ဖုန်ကြာဖူး ထံမှသဘောတူညီချက်ရပြီး အမြှောက်များကို ဗြောင်မသယ်ဘဲဖုံးကွယ်၍ သယ်သွားရန်ခွင့်ပြုပေးလိုက်ပါသည်။ ဗိုလ်မှူးကြီး သန်းအေး ၏ ပြန်ပြောချက်အရသိရသည်မှာ ကိုးကန့်အနေဖြင့် အစိုးရနှင့်ငြိမ်းချမ်းရေး မပျက်လိုကြောင်း၊ ဆန့်ကျင်ဘက် ကိုးကန့်ခေါင်းဆောင် ၇န်မိုးလျံ ကိုသာ ဦးတည်တိုက်ခိုက်ခြင်း ဖြစ်ကြောင်း ၊ စစ်တပ် အနေဖြင့် ကိုးကန့်ပြဿ     နာကိုပြေလည်အောင်ဖြေရှင်းပြီးထျှင် အစိုးရတပ်များ ပြန်လည်ဆုတ်ခွာသွား မည်ဆိုလျှင် ၀င်ခွင့်ပြုနိုင်ပါကြောင်းညှိနှိင်းခဲ့သည်ဟုသိရပါသည်။ ဗိုလ်မှူးကြီး သန်းအေး သည်ငြိမ်းချမ်းရေး မပျက်ရေး နှင့် န၀တ ခေါင်းဆောင်ကြီးများ၏ ရိုးသားသော တိ်ုင်းရင်းသား လူမျိုးများအပေါ် စိတ်စေတနာကောင်းများ ရှိလိုက်မည်ဟု ယုံကြည်ပြီး ကိုးကန့်ခေါင်းဆောင်များ နှင့် သဘောတူညီမှုရခဲ့ပါသည်။ 
သို့သော် ကိုးကန့်အရေးအခင်း ပြီးသွားပြီးနှစ်အတန်ကြာသော်လည်း စစ်တပ်များမထွက်သွားသည့် အပြင်  တရုတ်နိုင်ငံ၏ ကျူးကျော်မှုကို ကာကွယ်ရေးဆိုသည့်ကြွေးကြော်သံဖြင့် ကိုးကန့်မြို့တော် လောက်ကိုင်မြို့ တွင် တပ်မအဆင့်ရှိ ဒေသစစ်ဆင်ရေးဌါနချုပ်တစ်ခု ဖွင့်လှစ်ပြီး ဗိုလ်မှုးချုပ်အဆင့် တစ်ဦးခန့်အပ်ကာ တပ်ရင်း (၁၀) ရင်းဖြင့် ကိုးကန့်ဒေသကိုထိမ်းချုပ်ခဲ့ပါသည်။ ထို့ပြင် ၂၀၀၉ ခုနှစ် တွင် နယ်ခြားစောင့်တပ်ဖွဲ့ဆိုမှုကိုငြင်းဆန်သည့်အတွက် ကိုးကန့်ခေါင်းဆောင်ဟောင်း ရန်မိုးလျံ ၏ တစ်ပည့် ပယ်စောက်ချိန် ကို  ဖုန်ကြားရှင်၏အဖွဲ့တွင်းမှခွဲထွက်ရန်စည်းရုံးပြီး ဖုန်ကြားရှင် ကိုမောင်းထုတ်ခဲ့ပါသည်။၂၀၀၉ ခုနှစ်ကိုးကန့်အရေးအခင်းတွင် ကိုးကန့်လူမျိုးသောင်းချီ၍  တရုတ်နိုင်ငံ သိ့ထွက်ပြေးခဲ့သဖြင့် တရုတ် အစိုးရဒေါသထွက်ခဲ့သဖြင့် ဗိုလ်ချုပ်ကြီးသူရရွှေမန်း ပီကင်း သို့သွားရောက်ပြီးတောင်းပန်ခဲ့သော်လည်း မကြေနပ်သေးသဖြင့်   ဗိုလ်ချုပ်ကြီးသူရရွှေမန်း ထက်အဆင့်မြင့်သောသူ လာရန်ပြောလွှတ်လိုက်သဖြင့် ရက်သတ္တပတ်အတွင်း ဗိုလ်ချုပ်ကြီးမောင်အေး နှင့် အဖွဲ့သွားရောက်ပြီး တောင်းပန်ခဲ့ရသလို တရုတ်တို့လိုလားသော ဧရာဝတီမြစ်ဆုံဆည်စီမံကိန်း နှင့်  ရေနံပိုက်လိုင်းစီမံကိန်းတို့ကိုလည်း MOU လက်မှတ်ရေးထိုးပေး ခဲ့ရပါသည်။ ထိုအချိန်သည် မြန်မာအစိုးရ အား နိုင်ငံတကာမှ သံဃာအရေးခင်း  နာဂစ်လေမုန်တိုင်း ကိစ္စတို့ဖြင့်ကုလသမဂ္ဂတွင်ဖိအားပေးခံနေရချိန်ဖြစ်ပါသည်။ တရုတ် နှင့် ပတ်သက်၍လည်း လက်ရှိ ကာကွယ်ရေးဦးစီးချုပ် ကိုယ်တိုင်အရာရှိငယ်ဘ၀ ကတည်းကအစာမကြေခဲ့သူဖြစ်ပါသည်။ ၄င်းကိုယ်တိုင် ကစထမှုး တာဝန်ယူစဉ် `၀´အဖွဲ့အား အမေရိကန်နှင့်အစဉ်ပြေလျှင် ချေမှုန်းပစ်မည်ဟု ချိန်းခြောက်ခဲ့ဘူးပါသည်။              
အထက်ပါအခြေအနေအားလုံးကိုပြန်သုံးသပ်မည်ဆိုလျှင် ယခင် စစ်အစိုးရကိုသာ အပြစ်တင်ရပေ မည်။ စစ်တပ် ၊ တိုင်းရင်းသားလက်နက်ကိုင်အဖွဲ့များ ၊ ဒေသခံပြည်သူများ ၊ နိုင်ငံသူနိုင်ငံသားများ အကျိုးကို မျက်ကွယ်ပြု၍ ကိုယ့်ကျိုးစီးပွါးကိုရှေ့တန်းတင်ခဲ့ကြ၍ တပ်မတော်သားများအပါအ၀င် မိမိတို့ ညီအစ်ကိုမောင်နှစ်မများ စစ်ခင်းကြပြီး သေကြေပျက်စီးနေကြရပါသည်။ သူပုန်ရှိမှ စစ်တပ် ဂုဏ်တက်မည်ဆိုသည့် အတွေးအခေါ်မျိုးလည်း ယနေ့ခေတ်တွင်မရှိသင့်တော့ပါ။ လက်ရှိတိုင်းပြည် အခြေအနေကိ ကြည့်မည်ဆိုလျှင် အားလုံးသိသည့်အတိုင်း စစ်ဗိုလ်ချုပ် လက်ရှိ လက်ဟောင်း တို့ နှင့် ခရိုနီ လူတစ်စုသာ ကောင်းစားနေကြပြီး စစ်တပ်မှ တပ်ရင်းမှုးနှင့် အောက်အရာရှိ အရာခံ အကြပ် တပ်သားများ နှင့် မိသားစုများ ၊ သာမန် လူတန်းစားများ ဒုက္ခပင်လယ်ဝေနေခဲ့ကြပါသည်။
စာရေးသူအနေဖြင့်တင်ပြချင်သည်ကတော့ တရားခံအစစ်သည် စစ်ကျွန်စနစ် ဖြစ်ပါသည်။ စစ်ကျွန်စနစ် ကို စစ်ဝတ်မှအရပ်ဝတ်ပြောင်းပြီး အုပ်ချုပ်ပြရုံနှင့် ဒီမိုကရေစီစနစ် မဖြစ်နိုင်ပါ။ အရိုးစွဲနေပြီဖြစ်သော အကျင့်ဆိုးများကို အလွယ်တကူပြောင်းလဲလိုစိတ်ရှိမည် မဟုတ်ပါ။ ၂၀၁၅ ခုနှစ် မှာ ဖွဲ့စည်းပုံပြင်သလို လူတွေအားလုံးကိုလည်းလဲဘို့လိုပါသည်။ နိဂုံးချုပ် ရရင်တော့ တပ်မတော် အရာရှိငယ်များ နှင့် အခြားအဆင့်စစ်သည်များကျဆုံးခြင်းသည် တိုင်းပြည်နှင့်လူမျိုးအတွက်မဟုတ်ဘဲ စစ်ကျွန်စနစ် ကို အသက်သွင်းခဲ့သော အာဏာရှင်ကြီးများအား အသက်ပေး၍ကာကွယ်နေခြင်းသာ ဖြစ်ပါသည်။

No comments:

Post a Comment