Shwe Dagon

Shwe Dagon

Saturday, May 17, 2014

မြန်မာ့တပ်မတော်အကြောင်းတစ်စေ့တစ်ဆောင်း ၂၀၁၁ခုနှစ် ဇန်န၀ါ၇င်္ီလ (၁)ရက်



 


မြန်မာ့တပ်မတော်အကြောင်းတစ်စေ့တစ်ဆောင်း
၂၀၁၁ခုနှစ် ဇန်န၀ါ၇င်္ီလ (၁)ရက်
စာရေးသူ။  ဗိုလ်မှုးအောင်လင်းထွဋ်
မြန်မာ့တပ်မတော်သည် အစဉ်အလာအရ မျိုးချစ်လူငယ်များနှင့် စတင်ဖွဲ့စည်း တည်ထောင်ခဲ့သော်လည်း လွတ်လပ်ရေးရပြီးနောက်ပိုင်း ဗိုလ်ချုပ်အောင်ဆန်း ကျဆုံးခဲ့ပြီး နောက် နိုင်ငံရေးခေါင်းဆောင်များ စစ်ရေးခေါင်းဆောင်များ၏ အသုံးချမှုကို မြန်မာ တပ်မတော်မှ အရာရှိ အရာခံအကြပ်တပ်သားများ ပုံစံအမျိုးမျိုးနှင့်ခံနေရသည်မှာ ယနေ့ အထိဖြစ်ပါသည်။ ထိုသို့ခေတ်အဆက်ဆက် အသုံးချခံရမှုများအနက် ယနေ့ခေတ် စစ်ခေါင်းဆောင်ကြီး၊ ဗိုလ်ချုပ်မှူးကြီးသန်းရွှေ၏ အသုံးချမှု၊ စစ်ကျွန်ပြုမှုမှာ အဆိုးဆုံး အချိန်အခါဖြစ်ပါသည်။

၁၉၈၈ ခုနှစ်မတိုင်မှီတပ်မတော်
          ၁၉၆၂ခုနှစ် ဗိုလ်ချုပ်မှူးကြီးနေ၀င်း၊ အာဏာသိမ်းခဲ့ပြီးနောက် တပ်မတော်သည် တစ်ပါတီ ဆိုရှယ်လစ်စနစ်၏ အသုံးချခံအဖြစ် နှစ်ပေါင်း (၂၆)နှစ်၊ ကျွန်ခံခဲ့ရပါသည်။ လမ်းစဉ်ပါတီခေတ်တွင်၊ စစ်ခေါင်းဆောင်ပိုင်းများအနေဖြင့် အခွင့်ထူးများ များစွာခံစားခွင့် ရရှိခဲ့ကြသော်လည်း၊ အထက်အောက်ငယ်သား တပ်မတော်အရာရှိနှင့် စစ်သည်များ၏ ဘ၀သည် ၁၉၆၂ခုနှစ် မတိုင်မှီ တပ်မတော်၏အဆင့်အတန်းအောက် များစွာကျဆင်းခဲ့ရပါ သည်။ တပ်မတော်သားများအတွက် သတ်မှတ်ထားသော  ခံစားခွင့်များသည် တပ်မတော် နည်းဥပဒေများစာအုပ်အတွင်း၌သာ ရှိပါတော့သည်။ သို့သော် လမ်းစဉ်ပါတီခေတ်တွင် တပ်မတော်အတွင်း အထက်နှင့်အောက်လူတန်းစား ကွာခြားမှုကြီးကြီးမားမားမရှိခဲ့ပါ။ ရာထူးကြီးရသူများကို အတိုင်းအတာတစ်ခုအထိ ထိန်းချုပ်ထားနိုင်ခဲ့ပါသည်။ လက်အောက် စစ်သည်များ အဆင့်တန်းနိမ့်ကျခဲ့သည် ဆိုသော်ငြားလည်း စစ်သည်နှင့် မိသားစုများ၏ စားဝတ် နေရေးကို အတော်အတန် ထောက်ပံ့နိုင်ခဲ့သည့် အခြေအနေရှိပါသည်။
          တပ်မတော်အတွင်း ရာထူးအဆင့်ဆင့်တိုးမြှင့်ပေးသည့်အခါတွင်လည်း ဗိုလ်မှူးကြီး အဆင့်အထိ လူမျိုး၊ ဘာသာ ခွဲခြားမှုမရှိခဲ့ပါ။ စစ်တပ်နှင့် အရပ်ဖက်ရာထူးကြီးများတွင် တိုင်းရင်းသားများ ဘာသာခြားများပါ အတော်အတန်ခွင့်ပြုပေးခဲ့ပါသည်။ ပြည်သူလူထုနှင့် ဆက်ဆံရန်အတွက် တပ်မတော်စည်းရုံးရေးဌာနတစ်ခု ဖွင့်လှစ်ခဲ့ပြီး တပ်မတော်မှပြည်သူ လူထုအပေါ် မတော်မတရားမလျော်ကန်ပြုခဲ့မှုများရှိပါက ၄င်းဌာနမှ ထိထိရောက်ရောက် အရေးယူမှုများရှိသဖြင့် တပ်မတော်သားများအနေဖြင့် ပြည်သူလူထုကို လွတ်လပ်စွာ အနိုင် ကျင့်နိုင်ခဲ့မှုမရှိခဲ့ကြပါ။
          လမ်းစဉ်ပါတီအုပ်ချုပ်စဉ်ကာလတွင် တပ်မတော်၏ ပြည်ပရန်သူသည် တရုတ်နိုင်ငံ ဖြစ်ခဲ့ပြီး ပြည်တွင်းရန်သူသည် ကွန်မြူနစ်ဝါဒလက်ခံသော လူမျိုးစုသူပုန်များနှင့်လူမျိုးရေး အခြေခံသည့် သုပုန်ဖြစ်ပါသည်။ ထိုစဉ်ကတပ်မတော်တွင်း အရာရှိအရာခံ အကြပ်တပ်သား များအား တရုတ်မုန်းတီးရေး၊ ကွန်မြူနစ်ဝါဒဆန့်ကျင်ရေးအတွက် စိတ်ဓါတ်စစ်ဆင်ရေးအနေ ဖြင့် ၀ါဒဖြန့်စည်းရုံးခဲ့ပါသည်။ တပ်မတော်အတွင်းမှ တရုတ်သွေးပါသောအရာရှိများအား ဖယ်ရှားပစ်ခြင်း၊ ကွန်မြူနစ်နှင့်နီးစပ်ဝင်ဆံ့မှု၊ အဆက်အသွယ်ရှိသူများကို ဖယ်ရှားခြင်းများ ပြုလုပ်ခဲ့ပြီး၊ ပြည်တွင်းပြသနာတစ်ခုခုပေါ်တိုင်း ”ကွန်မြူနစ်”၏ လက်ချက်ဖြစ်သည်၊ ကွန်မြူနစ်သည် တပ်မတော်ကို ဖျက်ဆီးဖြိုခွဲမည့်သူ၊ တိုင်းပြည်ကိုဖျက်ဆီးမည့်သူအဖြစ် ပုံဖော်ပြီး စစ်သည်များမှိုင်းတိုက်ထားစေခဲ့ပါသည်။
၁၉၈၈ခုနှစ်အရေးခင်းကာလတွင်းတပ်မတော်
၁၉၈၆ခုနှစ်ခန့်ကစပြီး တပ်မတော်တွင်းရှိ အရာရှိစစ်သည်များ၊ မြန်မာ့ဆိုရှယ်လစ် လမ်းစဉ်အပေါ် ယုံကြည်မှုနည်းလာခဲ့ပါသည်။ အခြေခံအားဖြင့် တပ်မတော်သားများသည် မြန်မာ့ဆိုရှယ်လစ်လမ်းစဉ်ပါတီ (မဆလ)၏ အသုံးချခံနေရမှုပေါ် သိနားလည်လာခဲ့သလို တိုက်ပွဲတွင် ဒဏ်ရာရစစ်သည်များ၊ ခြေပြတ်လက်ပြတ်များကို ပစ်ပယ်ခြင်း၊ အခြေခံ တပ်မတော်တွင်းပညာရေး၊ ကျန်းမာရေးခံစားခွင့်များ လျော့နည်းလာခြင်း၊ ကုန်ဈေးနှုန်း များကြီးမြင့်မှုကြောင့် ၀င်ငွေနှင့်ထွက်ငွေမမျှတခြင်း စသည့် အခြေခံအချက်ကြီးများကို ပေါင်းစုံပြီး တပ်မတော်သား များအနေဖြင့် အပြောင်းအလဲတစ်ခုကို မျှော်လင့်ခဲ့ကြပါသည်။
ထိုသို့အပြောင်းအလဲကို မျှော်လင့်ခဲ့ကြသော်လည်း ၁၉၈၈ခုနှစ်အရေးခင်းကာလတွင် တပ်မတော်သားအနည်းစုသည်သာ ပြည်သူလူထုနှင့်အတူပူးပေါင်းပြီး ကြွေးကြော်ဆန္ဒပြခဲ့ကြ ပါသည်။ တပ်မတော်တပ်ရင်းအဖွဲ့လိုက်မပါဝင်ခဲ့ပါ။ ထိုစဉ်က တပ်မတော်ကို ပြည်သူနှင့် ပူးပေါင်းရန် နိုင်ငံရေးခေါင်းဆောင်များ မည်သည့်အတွက်ကြောင့် မဆော်အော မစည်းရုံးခဲ့ ခြင်းကို မသိခဲ့ကြပါ။ တပ်မတော်ကို ဗိုလ်ချုပ်နေ၀င်းနှင့် တစ်တန်းစားတည်း အမြင်ရှိခဲ့သည်ဟုထင်ပါသည်။ ၁၉၈၈အရေးခင်းကာလ အစပိုင်း သမ္မတဦးစိန်လွင် လက်ထက်တွင် အပြစ်မဲ့ပြည်သူတွေကို အလကားပစ်သက်ခိုင်းသည့်အတွက် တပ်မတော် ခေါင်းဆောင်ပိုင်းတွင် မကျေမနပ်ဖြစ်ကာ တပ်မတော်သားများအား ပစ်မိန့်ပြန်လည် ရုပ်သိမ်းပြီး သမ္မတဦးစိန်လွင်အား ဖယ်ရှားခဲ့သည်အထိ ဖြစ်ခဲ့ရပါသည်။ သမ္မတ ဒေါက်တာမောင်မောင်လက်ထက် တွေ့ဆုံဆွေးနွေးရေး ကမ်းလှမ်းခဲ့သော်လည်း မအောင် မြင်သည့်နောက်ဆုံး ကုန်သွယ်ရေးဝန်ကြီး ဌာနရှိ တပ်မတော်တပ်ခွဲတစ်ခွဲ လူထု၏စီးနင်းမှုကို ခံရပြီးနောက် ဗိုလ်ချုပ်နေ၀င်း၏ညွှန်ကြားချက်ဖြင့် တပ်မတော်မှ အာဏာသိမ်းမှု ပြုလုပ်ခဲ့ပါသည်။ အကြောင်းပြချက်အနေဖြင့် ”ကွန်မြူနစ်”များမှ တိုင်းပြည်အာဏာကို ဖြတ်လမ်းနည်းမှရယူပြီး တပ်မတော်ကို ဖြိုခွဲလိမ့် မည်ဆိုကာ တပ်မတော်အရာရှိ စစ်သည် များအား ၀ါဒဖြန့်ခဲ့ပါသည်။ တပ်မတော်အရာရှိ စစ်သည်တို့သည် အပြောင်းအလဲကို လိုချင်သည်ဖြစ် ”မဆလ”ထက်တော့ တော်သေးသည်ဆိုသည့်အမြင်ရှိခဲ့ပြီး တပ်မတော် ခေါင်းဆောင်များအပေါ် မျှော်လင့်တကြီး အပြောင်း အလဲလိုချင်ခဲ့ကြပါသည်။
၁၉၈၈ အရေးခင်းပြီးနောက်တပ်မတော် (ဗိုလ်ချုပ်မှူးကြီးစောမောင်ကာလ)
          ၁၉၈၈အရေးခင်းပြီးတပ်မတော်သည်အစောပိုင်းကာလများတွင် ဗိုလ်ချုပ်ကြီးနေ၀င်း၏ သြဇာအောက်တွင် တစ်စိပ်တစ်ပိုင်းရှိခဲ့ပါသည်။ နိုင်ငံတော်ငြိမ်ဝပ်ပိပြားမှုတည်ဆောက်ရေး အဖွဲ့ (န၀တ)ကို ဗိုလ်ချုပ်နေ၀င်းကိုယ်တိုင်ဖွဲ့စည်းပေးခဲ့ပြီး ဥက္ကဌအဖြစ် ဗိုလ်ချုပ်မှူးကြီး စောမောင်၊ အတွင်းရေးမှူးအဖြစ်ဗိုလ်မှူးချုပ်ခင်ညွန့်ကိုတစ်ဆင့်မြင့်တပ်မတော်ရာထူးပေးပြီး ၄င်းကိုယ်တိုင်နှုတ်မိန့်ပေးခန့်အပ်ခဲ့ပါသည်။ အရေးခင်းကာလအပြီးတွင် တပ်မတော်အနေ ဖြင့် တရုတ်ထောက်ခံသော ဗမာပြည်ကွန်မြူနစ်ပါတီ (ဗကပ) တပ်များနှင့် ရှမ်းပြည်နယ်တွင် တိုက်ပွဲကြီးများစွာကို ရင်ဆိုင်တိုက်ခဲ့ကြပါသည်။ ထိုစဉ်က တရုတ်တို့သည် ဗကပတို့အား မြန်မာနိုင်ငံအလယ်ပိုင်းအထိ ပြန်လည်ထိုးဖောက်နိုင်ရန် ထောက်ပံ့အားပေးခဲ့ပါသည်။ လူမျိုးစုသူပုန်များအနေဖြင့်လည်း၎င်းတို့၏ပြည်နယ်များတွင်ထိန်းချုပ်နိုင်ရေးကြိုးစားကြရာမှ  တပ်မတော်သည်တိုက်ပွဲကြီးများစွာနှင့် ရင်ဆိုင်ခဲ့ရပါသည်။
          အဆိုပါ ကာလများတွင် တပ်မတော်အနေဖြင့် တိုက်ပွဲများနှင့် ရင်ဆိုင်နေရခြင်း ကြောင့်၎င်း၊ မြို့ရွာများတွင်လည်းတပ်မတော်သားများအား ပြည်သူလူထုစည်းရုံးရေးကိစ္စများ ဆောင်ရွက်စေခြင်းကြောင့်၎င်း န၀တအစိုးရအနေဖြင့် တပ်မတော်အတွင်းသက်သာချောင်ချိ ရေးကိစ္စများကို အထူးဦးစားပေး ဆောင်ရွက်ပေးခြင်းကြောင့်၎င်း တပ်မတော်အတွင်းရှိ စစ်သည်များအနေဖြင့် ”န၀တ”ကို ”မဆလ”ထက် အတိုင်းတာတစ်ခုအထိ နှစ်ဘက် ကျေနပ်မှုများ ရှိခဲ့ပါသည်။
          ”န၀တ”ကာလတွင် တပ်မတော်သားတို့အနေဖြင့် ”၁၉၉၀” ရွေးကောက်ပွဲပြီးလျှင် ပြည်ထောင်စုမြန်မာနိုင်ငံကို ကာကွယ်သောတပ်မတော်၏ စစ်သည်များ (Professional Soldiers) အဖြစ် စစ်တန်းလျားကိုပြန်ရလိမ့်မည်ဟု ယုံကြည်မိခဲ့ကြပါသည်။ “၁၉၉၀“ ရွေး ကောက်ပွဲတွင်လည်း မည်သူတစ်ဦးတစ်ယောက်ကမှ အမိန့်ပေးစေခိုင်းခြင်းမရှိဘဲ လွတ်လွတ်လပ်လပ် မိမိကြိုက်နှစ်သက်သည့်ပါတီကို မဲပေးခွင့် မဲထည့်ခွင့်ရရှိခဲ့ပါသည်။ ထိုအချိန်က တပ်မတော်အရာရှိစစ်သည်များအနေဖြင့်`န၀တ’ သည် နိုင်ငံ၏အာဏာကို ရွေးကောက်ပွဲအနိုင်ရသည့်ပါတီသို့ ပေးအပ်မည်ဟုယုံကြည်ခဲ့ကြပါသည်။ ထိုစဉ်က အသက် အရွယ်ကြီးတပ်မတော်အရာရှိများကို အရပ်ဖက်ဝန်ကြီးဌာနများ၌အကြီးအကဲတာဝန် ပေးခဲ့ မှုများအပေါ်တပ်မတော်အတွင်းရွေးကောက်ပွဲပြီးလျှင်ရာထူးအဖြုတ်ခံ၏ရမည်ဟု အမြင်ရှိခဲ့၍ မည်သူမျှမပြောင်းရွှေ့လိုကြပါ။
          ၁၉၉၀ရွေးကောက်ပွဲတွင်အမျိုးသားဒီမိုကရေစီအဖွဲ့ချုပ်(NLD) အပြတ်အသတ်အနိုင် ရရှိခဲ့ပြီးနောက် တပ်မတော်ထိပ်ပိုင်းခေါင်းဆောင်များအတွင်း စိုးရိမ်ကြောင့်ကြမှုများနှင့် ကိုယ်ကျိုးစီးပွားကာကွယ်ရေးအတွက် သဘောထားတင်းမာသူ အင်အားအများစုသည် နိုင့်ငံတော်အာဏာကိုအနိုင်ရ NLD ပါတီအားလွဲပြောင်းပေးရေးကို ကန့်ကွက်ခဲ့ကြသည့် အတွက် မလိမ့်တစ်ပတ်ဖြင့်`န၀တ’ သည်`၁/၉၀’ ကြေငြာချက်ထုတ်ပြန်ပြီးရွေးကောက်ပွဲ အနိုင်ရကိုယ်စားလှယ်များသည် “ဖွဲ့စည်းအုပ်ချုပ်ပုံရေးဆွဲရန်” ဟုဆိုခဲ့ပါသည်။
                   ထိုစဉ်ကာလများတွင် တပ်မတော်တပ်ရင်းတပ်ဖွဲ့များအာွးှန်ကြားချက်များ မြောက်မြားစွာ ထုတ်ပြန်ခဲ့ပြီး ရွေးကောက်ပွဲအနိုင်ရပါတီသည် ၁၉၈၈အရေးခင်းတွင် တပ်မတော် အရာရှိစစ်သည်များအရပ်သူအရပ်သားများကို ပစ်ခတ်မှုကြောင့် တပ်မတော် အတွင်း ဗိုလ်မးကြီးနှင့် အထက်အရာရှိကြီးများကို အရေးယူလိမ့်မည်၊ လက်အောက်စစ်သည် များကို လည်းအရေးယူပြီးတပ်မတော်ဖြိုခွဲလိမ့်မည်၊ NLD သည် ‘ဗကပ’ များဝိုင်းရံနေသော ပါတီ ဖြစ်တပ်မတော်ကို အပြုတ်တိုက်ရေးလမ်းစဉ်ကို ကျင့်သုံးလိမ့်မည်ဟု ၀ါဒဖြန့်မှုများ ပြုလုပ်ခဲ့ပါသည်။ ကဲ့သို့အားဖြင့် တပ်မတော်သားတို့သည် အတိုက်အခံနိုင်ငံရေးပါတီများ အပေါ် အဆိုးမြင်စေရန် အဆက်မပြတ်ဝါဒဖြန့်မှုများကို ခံခဲ့ရပါသည်။
          ရွေးကောက်ပွဲအနိုင်ရပါတီကို အာဏာလွဲပေးပြီး စစ်တန်းလျားပြန်မည်ဟုဂတိပေးခဲ့ သော ဗိုလ်ချုပ်မးကြီးစောမောင်သည် ရွေးကောက်ပွဲအလွန်ကာလများမှစစိတ်ကစဉ် ကလျားဖြစ်ခဲ့ပါသည်။ ထိုအချိန်မှစNLDခေါင်းဆောင်များကို ဖမ်းဆီးထောင်သွင်းအကျဉ်း ချပြီးစစ်ကြောမေးမြန်းချက် အစီရင်ခံစာများကို ဗိုလ်ချုပ်မှူးကြီးစောမောင်ကိုယ်တိုင်ဖတ်ရှုပြီး ပြန်လည်မေးမြန်းခိုင်းခြင်းစသည့် ကိစ္စများထိ လုပ်ဆောင်လာခဲ့ပါသည်။ အထူးသဖြင့် ကွန်မြူနစ် အရောင်ရှိသော NLDခေါင်းဆောင်များကို ဖမ်းဆီးထောင်တွင်း အကျဉ်းချစေခိုင်း ခဲ့ပါသည်။
ရွေးကောက်ပွဲအလွန်ကာလတွင် တပ်မတော်ကို အထူးကျစ်လစ်စေရန်အတွက် တပ် တွင်းမိသားစု သက်သာချောင်ချိရေးကိစများကို အထူးဦးစားပေး ဆောင်ရွက်ပေးခဲ့သည့် အ  တွက်တပ်မတော် အရာရှိစစ်သည်များသည နိုင်ငံရေးဘက်ကို စိတ်ဝင်စားမှုမရှိဘ တပ်မတော် ခေါင်းဆောင်ကြီးများဆောင်ပုဒ်များဖြစ်ကြသည့် “တပ်မတော်သာအမိ၊ တပ်မတော်သာအဖ” “တပ်မတော်အင်အားရှိမှ တိုင်းပြည်အင်အားရှိမည်” စသည်တို့ ကြားတွင်အဟုတ်ထင်မှတ်ခဲ့ပြီး နိုင်ငံရေးပါတီများအားတိုင်းပြည်ဖျက်မည့်ရန်သူ တပ်မတော် ကိုဖြိုခွဲမည့်ရန်သူအဖြစ် အမြင်ရစေရန် တပ်မတော်အရာရှိ စစ်သည်မိသားစုများကို သင်တန်း များဆွေးနွေးပွဲများတွင် ဟောပြောဆွေးနွေးပွဲမှုများပြုလုပ်ပြီး တပ်မတော်နှင့်နိုင်ငံရေးပါတီ များကို သွေးခွဲခဲ့ပါသည်။
          ထို့ပြင် တပ်မတော်အရာရှိ စစ်သည်များ ကျဆုံးမှု၊ ဒဏ်ရာရမှုများ လျော့နည်းစေပြီး စစ်ရေးကိစများ လျော့နည်းသွားစေရန်အတွက် “လက်နက်ကိုင်ပြီးငြိမ်းချမ်းရေး” ဆိုသည့် ပေါ်လစီကို ပြောင်းလဲကျင့်သုံးလိုက်သည့်အတွက် ရှမ်းပြည်နယ်အတွင်းရှိတိုက်ပွဲများသည် အချိန်ကာလတိုအတွင်း ရပ်စဲသွားသည့်အတွက် စစ်မြေပြင်တွင် တာဝန်ထမ်းဆောင်နေ ရသောတပ်များသည် နောက်တန်းဌာနချုပ်သို့ ပြန်ရပြီးမိသားစုနှင့် ပြန်လည်နေထိုင်ရသည့် အတွက်စစ်သည် များပျော်ရွင်မှုများရစေခဲ့ပါသည်။ ရှေ့တန်းသို့သွားရသောစစ်သည်များ အတွက် နောက်တန်းဌာနချုပ်ရှိမိသားစုနှင့် ရက်ရှည်လများအတူ ပြန်လည်နေထိုင်ခွင့်ရရှိရေး သည်၎င်းတို့အတွက် မဟာအခွင့်အရေးပင်ဖြစ်ပါသည်။ မည်သည့်အိမ်ထောင်သည် အရာရှိ စစ်သည်ဟူသမျှ အန္တရယ်များသော ရှေ့တန်းစစ်မြေပြင်သို့ မသွားရောက်လိုကြပါ။
          ထို့ကြောင့်“ဗိုလ်ချုပ်မးကြီးစောမောင်”သည်၎င်းကိုယ်တိုင်ကတိပေးခဲ့သော “စစ်တန်း လျားကို ရွေးကောက်ပွဲပြီးလျှင်ပြန်မည်“။ ဆိုသောစကားကို မလိမ့်တစ်ပက် မသိချင်ရောင် ဆောင်နိုင်ရန်အတွက် တပ်မတော်အရာရှိ၊ စစ်သည်များကိုအသုံးချပြီး အတိုက်အခံနိုင်ငံရေး ပါတီများနှင့် ပြည်သူလူထုကိုချေမှုန်းရေးကို ပြုလုပ်စေခိုင်းခဲ့ပါသည်။ တပ်မတော် ခေါင်းဆောင်များသည် နိုင်ငံတော်ငြိမ်းချမ်းရေးကို ဆောင်ရွက်နေသည်။ အတိုက်အခံ နိုင်ငံ ရေးပါတီများသည် တိုင်းပြည်မငြိမ်သက်အောင် ပြုလုပ်နေသည်။ ထို့ကြောင့်၎င်းတို့သည် တိုင်းပြည်၏ ရန်သူများဖြစ်ကြသည်ဟုဆိုကာ တပ်မတော်အတွင်း အတိုက်အခံနိုင်ငံရေး သမားများအပေါ် အဆိုးမြင်စေရန်ရည်ရွယ်ပြီး တပ်တွင်းစည်းရုံးမှုများ ရှိခဲ့ပါ၏။
          ၁၉၉၀ ရွေးကောက်ပွဲအလွန်တွင် ဗိုလ်ချုပ်မှူးကြီးစောမောင်အနေဖြင့် န၀တအဖွဲ့တွင်း ဖိအားပေးခံရမှုကြောင့် စိတ်ပိုင်းဆိုင်ရာ ခံစားမှုများရရှိလာသလို အဆိုပါကာလများတွင် န၀တဒုဥက္ကဌ ဗိုလ်ချုပ်ကြီးသန်းရွှေသည် အတော်အတန်နေရာရယူခဲ့ပြီး တပ်မတော်စည်းရုံး ရေးနှင့် ၀ါဒဖြန့်ချီရေးများတွင် ကိုယ်တိုင်ပါဝင်ခဲ့သည်များ ရှိခဲ့ပါသည်။ ထိုစဉ်ကဗိုလ်ချုပ်ကြီး သန်းရွှေနှင့် ဗိုလ်ချုပ်ခင်ညွန့်တို့၏ဆက်ဆံရေးသည် ယခင်ကထက်ပိုမိုနီးစပ်မှု ရှိခဲ့ကြပါသည်။
          ထို့ကြောင့် ၁၉၉၂ခုနှစ် ဗိုလ်ချုပ်မှူးကြီးစောမောင်ကို ဖယ်ရှားရေးကိစ္စများကို ဗိုလ်ချုပ် ခင်ညွန့်မှဦးဆောင်န၀တအဖွဲ့ဝင် ဗိုလ်ချုပ်ကြီးများကို စည်းရုံးပြီးအလွယ်တကူ စီစဉ် ဆောင်ရွက်နိုင်ခဲ့ပါသည်။ ဗိုလ်ချုပ်မှူးကြီးစောမောင်အနေဖြင့် ထိုစဉ်က၄င်းအားထောက်ခံ သော ဗိုလ်ချုပ်ကြီးများ တစ်ဦးတစ်ယောက်မှ မရှိသည့်အတွက်လည်း လွယ်လွယ်ကူကူ ဖယ်ရှားခံလိုက်ရခြင်းဖြစ်ပါသည်။  ၁၉၉၂ခုနှစ်တွင်းရှိသော စစ်တိုင်းမှူးနှင့် တပ်မမှူးအများစု သည်ဗိုလ်ချုပ်ကြီးသန်းရွှေ၏ တပည့်များဖြစ်ခဲ့သူ၊ ဆက်သွယ်ပတ်သက်သော တပ်မှူးကြီး များသာဖြစ်ကြသည့်အတွက် ဗိုလ်ချုပ်ကြီးသန်းရွှေကို ခေါင်းဆောင်တင်ရေးကို ကန့်ကွတ်သူ မရှိ  သဘောတူညီခဲ့ကြပါသည်။
          ဗိုလ်ချုပ်မှူးကြီးစောမောင် ဖယ်ရှားခံရမှုနှင့်ပတ်သက်၍ တပ်မတော်အရာရှိ စစ်သည် များအတွင်း တစ်စုံတစ်ရာပြသနာမရှိခဲ့ကြပါ။ ဗိုလ်ချုပ်မှူးကြီးစောမောင်အနေဖြင့် တပ်မတော် အတွင်း လူရင်းတပည့်များမရှိသည့်အတွက်လည်း ထုတ်ပယ်ခြင်းခံလိုက်ရခြင်း ဖြစ်ပါသည်။ တပ်မတော်အတွင်း ဆရာ၊ တပည့်မွေးမြူထားခြင်းသည် မိမိအာဏာတည်ဆောက်ထိန်းသိမ်း ကာကွယ်ထားနိုင်ရေးအတွက် အရေးပါသည့်အချက်ဖြစ်သည်ကို တပ်မတော်တွင်း မျိုးဆက် သစ်ခေါင်းဆောင်များ နားလည်သဘောပေါက်လာသလို ကျင့်သုံးလာကြသည့်အတွက် တပ်မတော်ခေါင်းဆောင်ကြီးငယ်အပိုင်း သူ့တပည်၊ ကိုယ်တပည့် သွေးကွဲမှုများ စတင် ရှိလာခဲ့ပါသည်။
၁၉၉၂ခု ဧပြီလမှစတင်ခဲ့သည် ဗိုလ်ချုပ်မှူးကြီးသန်းရွှေ၏ နည်းဗျူဟာများ
          ဗိုလ်ချုပ်မှူးကြီးသန်းရွှေကို လူရိုး၊ လူအ၊ လူကောင်းဟု ထင်မြင်ခဲ့ကြသော ဗိုလ်ချုပ် ကြီးနေ၀င်းအပါဝင် စစ်ခေါင်းဆောင်များသည် အထင်နှင့် အမြင် လုံးဝမတူခဲ့ကြ သည်ကို ၄င်းတို့ကိုယ်တိုင်ခံကြရသည့်အခါမှ သဘောပါက်နားလည်ခဲ့ကြသည်။ ဦးနေ၀င်းသည် ၁၉၈၅ခုနှစ် မဆလပါတီညီလာခံတွင် ဗိုလ်ချုပ်သန်းရွှေအား တိုင်းမှူးအဆင့်မှနေ၍ ရာထူး (၂)ဆင့်တစ်ပြိုင်နက်တိုးကာ အနာဂါတ်တပ်မတော်အတွက် ဒုတိယကာကွယ်ရေး ဦးစီးချုပ် (ကြည်း)နှင့် မဆလပါတီ၏ ဗဟိုအလုပ်မှုဆောင်ရာလူးကို ပေးအပ်ခဲ့ပါသည်။ ဗိုလ်ချုပ် သန်းရွှေအနေဖြင့် ထိုစဉ်က စစ်ရေးစွမ်းရည်၊ အုပ်ချုပ်ရေးစွမ်းရည်သာမန်သာရှိသော စစ်ခေါင်းဆောင်တစ်ယောက်ဖြစ်ခဲ့သော်လည်း လူရိုး၊ လူအ ခိုင်းတာကိုလုပ်မည်ဟု ထင်မြင် ယူဆခြင်းကြောင့် ဦးနေ၀င်းသည် တပ်မတော်၏ ဒုတိယအကြီးအကဲတာဝန်ကို အပ်နှင်းခြင်း ခံခဲ့ရပါသည်။ သို့သော် ယနေ့အချိန်အခါတွင် “ဖွတ်ထွက်မှတောင်ပို့” မှန်းသိသလို တိုင်းပြည် တပ်မတော်နှင့် ဘာသာသာသနာကို ဖျက်ဆီးနေသည့် လူယုတ်မာကြီးတစ်ယောက် ဖြစ်နေ သည်ကိုတွေ့မြင်နေရပြီး ဖြစ်ပါသည်။
          ဗိုလ်ချုပ်ကြီးသန်းရွှေသည် အာဏာကိုလက်ခံရရှိပြီး ချက်ခြင်းဆိုသလို ဗိုလ်ချုပ် စောမောင်ကမောင်းထုတ်ထားသော န၀တအတွင်းရေးမှူး (၂) ဗိုလ်ချုပ်တင်ဦးနှင့် စစ်ဦးစီးမှူး (ဗိုလ်မှူးကြီးဟောင်း) ဗိုလ်မှူးကြီးခင်မောင်သန်းတို့ကို ပြန်လည်ခေါ်ယူပြီး စစ်ရုံးချုပ်တွင် မူလတာဝန်များကို ပြန်လည်ခန့်အပ်ခဲ့ပါသည်။ ပြီးနောက်စစ်ရုံးချုပ်နှင့် အရေးပါသောနေရာ များတွင်တာဝန်ယူနေကြသည့် ဗိုလ်ချုပ်စောမောင်နှင့်ဆက်နွယ်သည့် အရာရှိကြီးငယ်များကို ပြောင်းရွေ့နေရာချထားခြင်းနှင့် ဖယ်ရှားခြင်းကိစ္စများကို ဆောင်ရွက်ခဲ့ပြီး ဗိုလ်ချုပ်သန်းရွှေ၏ လက်အောက်တာဝန်ထမ်းဆောင်ခဲ့ဖူးသော လက်အောက်ငယ်သားတပည့်များကို အရေးပါ သည့်ရာထူးကြီးငယ်အဆင့်ဆင့်တွင် နေရာချထားမှုလုပ်ငန်းကို စတင်ခဲ့ပါသည်။
          ဗိုလ်ချုပ်သန်းရွှေအာဏာရယူပြီး ရက်ပိုင်းအတွင်း၌ပင် တပ်မတော်ထော်လှမ်းရေး၏ ဒုတိယအကြီးအကဲကို ၄င်း၏သားတပည့် ဗိုလ်ချုပ်ကျော်ဝင်းကို တာဝန်ပေးပြီး၊ ဗိုလ်ချုပ်ခင်ညွန့်၏လက်အောက်တွင် အနီးကပ်တာဝန်ပေးခဲ့ပါသည်။ ဗိုလ်ချုပ်စောမောင် ဖယ်ရှားပြီးလျှင် န၀တဒုဥက္ကဌအဖြစ် ခန့်အပ်ခံရလိမ့်မည်ဟု မျှော်လင့်ခဲ့သောဗိုလ်ချုပ် ခင်ညွန့်အား  (၁)နှစ်ပတ်ဝန်းကျင်ခန့် မက်လုံးပေးပြီးခိုင်းစေခဲ့ပါသည်။ ထိုစဉ်က ဗိုလ်ချုပ် ခင်ညွန့်ကိုယ်တိုင် ဒုတိယနိုင်ငံရေးခေါင်းဆောင် ဖြစ်လာလိမ့်မည်ဟု မျှော်လင့်ခဲ့ပါသည်။ ဗိုလ်ချုပ်မောင်အေးသည် ဒုတိယကာကွယ်ရေးဦးစီးချုပ် (ကြည်း)အဖြစ် ဒုတိယစစ်ရေးခေါင်း ဆောင် ဖြစ်လာလိမ့်မည်ဟု ထိုစဉ်ကအများမှ ထင်မြင်မှုများရှိခဲ့ကြပါသည်။
          ဗိုလ်ချုပ်စောမောင်အုပ်ချုပ်စဉ်က ဗိုလ်ချုပ်ခင်ညွန့်သည် လုပ်ပိုင်ခွင့်တော်တော် များများကို လွတ်လွတ်လပ်လပ်ဆုံးဖြတ်ခွင့် လုပ်ပိုင်ခွင့်ရခဲ့သော်လည်း ဗိုလ်ချုပ်သန်းရွှေ အာဏာရပြီးနောက်ပိုင်းတွင် ကန့်သတ်ခံရမှုများရှိလာခဲ့ပါသည်။ ယခင်ကဗိုလ်ချုပ်ခင်ညွန့် သည် ဦးနေ၀င်းထံသွားရောက်အစီရင်ခံနေခဲ့သော်လည်း နောက်ပိုင်းတွင်  ဗိုလ်ချုပ်သန်းရွှေ အနေဖြင့် မလိုလားသည့်အရိပ်လက္ခဏာများ ပြသခဲ့သဖြင့် ဆက်သွယ်မှုဝေးသွားသလို ဦးနေ၀င်းကိုယ်တိုင်လည်း ဘာသာရေးဘက်ကို ပြောင်းလဲလာသည့်အတွက် ဗိုလ်ချုပ် သန်းရွှေလက်ထက်တွင် ဦးနေ၀င်း၏သြဇာမရှိသလောက်ဖြစ်ခဲ့ပါသည်။ ဗိုလ်ချုပ်သန်းရွှေ ကိုယ်တိုင်လည်း ဦးနေ၀င်းလက်ထက် သမီးစန္ဒာဝင်း၏ ၀င်ရောက်စွက်ဖက်မှုများနှင့် ပတ်သက်၍ မကျေလည်မှုများရှိခဲ့ခြင်းကြောင့်လည်း ဦးနေ၀င်း၏မိသားစုအပေါ် အရေးမပေး ရန်ညွှန်ကြားမှုများ ရှိခဲ့ပါသည်။ ဦးစောမောင်လက်ထက်တွင် ဦးနေ၀င်း၏မိသားစုများကို တော်ဝင်မိသားစုကဲ့သို့ ဆက်ဆံရန်မှာကြားထားချက်များကို ဗိုလ်ချုပ်သန်းရွှေ လက်ထက် တွင်ရုတ်သိမ်းခိုင်းသည်များရှိပါသည်။ ယခင်စန္ဒာဝင်းနိုင်ငံခြားရောက်လျှင် သံအမတ်ကြီးများ ကိုယ်တိုင်ခရီးဦးကြိုပြုခိုင်းရာမှမလုပ်ရဟူသောပြတ်သားသည့်အမိန့်များ ထွက်လာခဲ့ပါသည်။
          ဗိုလ်ချုပ်စောမောင်လက်ထက်ပြုလုပ်ခဲ့သော ဗကပမှခွဲထွက်လာသော ၀၊ ကိုးကန့်၊ အခါ၊ ရှမ်း ငြိမ်းချမ်းရေးအဖွဲ့များ ဆောင်ရွက်ခဲ့မှုနှင့် ပတ်သက်၍ ထိုစဉ်က လုပ်နည်းလုပ်ဟန် ကိုမနှစ်သက်ခဲ့သော်လည်း ပြန်မပြောရဲသဖြင့် ငြိမ်ခံခဲ့ပါသည်။ အဆိုပါအဖွဲ့များသည် ၄င်း ကိုယ်တိုင် စစ်မြေပြင်တွင် တိုက်ခိုက်ခဲ့ရသူများဖြစ်ပြီး အဆိုပါ ဗကပ၏လက်ချက်ကြောင့်  ဗိုလ်ချုပ်သန်းရွှေ တပ်မ (၈၈)တပ်မမှူးတာဝန်ထမ်းဆောင်စဉ် မိုင်းယောင်းမြို့အသိမ်းခံခဲ့ရမှု များသည်မမေ့နိုင်စရာအဖြစ်များ ဖြစ်ခဲ့ပါသည်။ သို့သော်ထိုစဉ်က တရုတ်နိုင်ငံနှင့် ပြသနာမဖြစ်စေရေးဆိုသည့် မူဝါဒအောက်တွင် အဆိုပါအဖွဲ့များကို အလိုက်အထိုက် ဆက် ဆံခဲ့ပါသည်။ ဗိုလ်ချုပ်သန်းရွှေသည် ဗကပမှခွဲထွက်လာသော ၀၊ ကိုးကန့်၊ အခါ၊ ရှမ်း ခေါင်းဆောင်များနှင့် တစ်ကြိမ်တစ်ခါမှ လက်ခံပြီးတွေ့ဆုံခဲ့ခြင်း မရှိခဲ့ပါ။ သို့သော် ၁၉၉၂/ ၁၉၉၃ ခုနှစ်ကာလများတွင် မြန်မာအစိုးရသည် နိုင်ငံခြားငွေမရှိသည့်အတွက် ရှမ်းပြည်နယ် ငြိမ်းချမ်းရေးအဖွဲ့များမှ မူးရစ်ဆေးဝါးမှရရှိသည့် လုပ်ငန်းမှရသည့်ငွေများကို ဖွံ့ဖြိုးရေး လုပ်ငန်းများတွင် တစ်စိပ်ပါဝင်လုပ်ကိုင်ခွင့်ပေးခြင်းဖြင့် နိုင်ငံ၏စီးပွားရေးကို ကျောထောက် နောက်ခံပြုနေသည့်အချိန်တစ်ခု ဖြစ်နေခြင်းကြောင့်လည်းဖြစ်ပါသည်။
          ဗိုလ်ချုပ်သန်းရွှေအာဏာရထားပြီးအချိန်မှစငြိမ်းချမ်းရေးဆောင်ရွက်မှုများကို နီုင်ငံရေးအရ လုပ်ဆောင်ရန်ညွှန်ကြားချက်များ ပြုလုပ်ခဲ့ပါသည်။ ယခင်တရုတ်နိုင်ငံ၏ အားပေးသောငြိမ်းချမ်းရေးအဖွဲ့များသည် “န၀တ“အားနိုင်ငံရေးအရ တိုက်ခိုက်မှုမရှိခဲ့ကြ သဖြင့်မကြိုက်သော်လည်း ပြသနာမရှိဟု အတွေးအမြင်မျိုးရှိခဲ့ပါသည်။ အမှန်တကယ် နိုင်ငံ ရေးအရတိုက်ခိုက်ရမည်မှာ အနောက်နိုင်ငံများ၏ ထောက်ခံမှုကိုရယူထားကြသည့် လူမျိုးရေး အခြေခံလူမျိုးစုခေါင်းဆောင်များ၏ လက်နက်ကိုင်အဖွဲ့များကို ဖဲ့ထုတ်စည်းရုံးစေခြင်း ဖြစ်ပါ သည်။ အဓိကအားကောင်းသော KNU ကို ဖြိုခွဲရန်အတွက် ၄င်း၏နိုင်ငံရေးအကြံပေး ခေါင်းဆောင်များဖြစ်ကြသော ကေအိုင်အိုနှင့် မွန်ပြည်သစ်ပါတီကို ခွဲထုတ်ပြီး ငြိမ်းချမ်းရေး ယူစေခြင်းဖြင့် KNU ကိုအားပျော့သွားစေအောင် အမိန့်ပေးခဲ့ပါသည်။
       ဤသို့အားဖြင့်  တိုင်းရင်းသားလက်နက်ကိုင်အများစုသည် ငြိမ်းချမ်းရေးအဖွဲ့အနေဖြင့် “န၀တ“၏နိုင်ငံရေးလက်နက်တစ်ခု ဖြစ်လာခဲ့ပါသည်။ ပြည်တွင်းအတိုက် အခံများနှင့်၎င်း၊ ပြည်ပနိုင်ငံများနှင့်၎င်း၊ နိုင်ငံရေးအရပြောဆိုရာတွင် သူပုန်များသောမြန်မာနိုင်ငံတွင် တပ်မတော်သည် မရှိမဖြစ်အရေးပါသော အဖွဲ့စည်းဖြစ်သည် တပ်မတော်၏နိုင်ငံရေး ဦးဆောင်မှုမရှိလျှင် နိုင်ငံအစိပ်စိပ်ပြိုကွဲသွားလိုက်မည်ဟူသော ၀ါဒဖြန့်မှုကို ကျယ်ကျယ် ပြန့်ပြန့်လုပ်ဆောင်စေခဲ့ပါသည်။ သို့သောအတွေးအမြင်များကို တပ်မတော်တွင်း ကျယ်ကျယ် ပြန့်ပြန့်သွပ်သွင်းထားပါသည်။
          တိုင်းရင်းသားငြိမ်းချမ်းရေးအဖွဲ့များနှင့် ငြိမ်းချမ်းရေးရနေစဉ်ကာလတွင် အင်အားမတိုး ချဲ့ရေးသဘောတူညီချက်ကို အစိုးရမှလစ်လျှူရှုကာ တပ်မတော်၏အင်အားကို မူလအင်အား ထက်(၂)ဆထပ်မံတိုးချဲ့သလို ခေတ်မှိတပ်မတော်ဆိုပြီး လက်နက်အသစ်အဆန်းများကို တပ်တင်လာခဲ့ပါသည်။ တစ်နည်းတစ်လမ်းအားဖြင့် တပ်မတော်အရာရှိစစ်သည်များ ရာထူး များတိုးတက်ရရှိစေပြီး တဒင်္ဂသာယာမှုဖြစ်အောင် ဖန်တီးပေးလိုက်သည့်သဘောလည်း ဆောင်ပါသည်။ အခြားတစ်ဖက်မှလည်း အင်အားကောင်းလာသောတပ်မတော်မှ အရာရှိ စစ်သည်များကို တိုင်းမှူး၊တပ်မမှူးအစည်းဝေးများမှတစ်ဆင့် အမြဲတစေညွှန်ကြားနေသည်မှာ တိုင်းရင်းသားငြိမ်းချမ်းရေးအဖွဲ့များသည် တစ်ချိန်ချိန်တွင် စစ်ပြန်တိုက်ရမည့်ရန်သူများ ဖြစ်ကြောင်း၊ ၄င်းတို့၏ စစ်ရေးလှုပ်ရှားမှုများနှင့် ပတ်သက်မျက်ခြေမပြတ်စုံစမ်းနေရန်လို ကြောင်းကို တဖွဖွမှာကြားရင်း တပ်မတော်နှင့်ငြိမ်းချမ်းရေးအဖွဲ့များအကြား ယုံကြည်မှုမရှိ စေရန်မှာကြားထားခဲ့ပါသည်။
          တပ်မတော်အတွင်း ထောက်လှမ်းရေး၏ သြဇာမလွမ်းရန်ရည်ရွယ်ချက်ဖြင့် ဗိုလ်ချုပ် သန်းရွှေအာဏာယူပြီးနောက်ပိုင်း အချိန်အခါမှစပထမဦးဆုံးထုတ်ပြန်သည့်အမိန့်သည် “ထောက်လှမ်းရေး အဖွဲ့များသည် တပ်မတော် အရာရှိကြီးများ၊ အရပ်ဝန်ကြီးများနှင့် ပတ်သက်၍ ဗိုလ်ချုပ်သန်းရွှေ၏အမိန့်မရဘဲ စုံစမ်းခြင်း၊ မေးမြန်းခြင်း၊ ထောက်လှမ်းခြင်း တို့ကိုလုံးဝမပြုလုပ်ရဟု ညွှန်ကြားချက်ထုတ်ခဲ့ပါသည်။ ထို့ပြင် ဗိုလ်ချုပ်ခင်ညွန့်၏ အခန်းကန္တကို လျော့ချသည့်အနေဖြင့် န၀တဒုဥက္ကဌနှင့် ဒုတိယတပ်မတော်ကာကွယ်ရေး ဦးစီးချုပ်ရာထူးကို ဗိုလ်ချုပ်မောင်အေးအား ခန့်အပ်ခဲ့ပြီးနောက် ဗိုလ်ချုပ်ခင်ညွန့်ကို အရေးပါ သည့်ကန္တများတွင် တာဝန်ပေးမှုကိုလျော့ချပြီး၊ လုပ်ပိုင်ခွင့်များကို ပြန်လည်ရုတ်သိမ်းခဲ့ရသည့် အနေထားများရှိခဲ့ပါသည်။ ထိုအချိန်ခါများမှစ၍ဗိုလ်ချုပ်မောင်အေးနှင့် ဗိုလ်ချုပ်ခင်ညွန့်သည်  ဗိုလ်ချုပ်သန်းရွှေ၏ ကစားကွက်များတွင် လှုပ်ရှားခဲ့ကြရပ်သည်။
        တပ်မတော်တွင်းရာထူးကြီးများ ဥပမာ တိုင်းမှူး၊ တပ်မမှူးများခန့်အပ် မှုနှင့်ပတ်သက်ဗိုလ်ချုပ်သန်းရွှေ ကိုယ်တိုင်ကြိုးကိုင်လာသည့်သဘောရှိပါသည်။ တပ်မတော်အရာရှိများအတွင်ှးNLDနှင့် ပက်သက်သောသူကို ဗိုလ်လောင်းအဖြစ်ပင် လက်မခံရန်ညွန်ကြားခဲ့ပါသည်။တပ်မတော်အတွင်းလက်ရှိ NLD နှင့်ပက်သက်သော အရာရှိများအားအရပ်ဖက်ပြောင်းရွှေ့ခြင်း၊ရာထူး တိုးမပေးခြင်း နည်းများဖြင့်ဟန့်တားပြီး NLDမုန်းတီးရေးကိုအကြောက်တရားဖြင့် တပ်မတော်သားများ အပေါ်ဆောင်ရွက် ခဲ့ကြပါသည်။ဘာသာရေးနှင့်ပတ်သက်လည်းတပ်မတော်အရာရှိ တစ်ဦး၏ ဇနီးသည် သည်မူစလင်(သို့)ခရစ်ယာန်ဘာသာဝင်ဖြစ်ခဲ့လျှင် ထိုအရာရှိကို တစ်ဆင့်မြင့်ရာထူး အတွက်စဉ်းစားခံရခြင်းမရှိပါ။လူမျိုးရေးအရတိုင်းရင်းသား လူမျိုး တစ်မျိုးဖြစ်လျှင်လည်း အဆင့်ဆင့်စီစစ်ပြီးမှရာထူးတိုးပေးလေ့ရှိပါသည်။ တပ်မတော် တွင်းအရာရှိများသည် ဘွဲ့မရလျှင်နိုင်ငံတော်ကာကွယ်ရေးတက္ကသိုလ်တက်ခွင့်မရပါ။ နိုင်ငံတော်ကာကွယ်ရေး တက္ကသိုလ် တက်ခွင့်မရလျှင် ဗိုလ်ချုပ်ရာထူးကိုမရနိုင်ပါ။ တပ်မတော်တွင် အသက် (၃၅)နှစ်မတိုင်မီဗိုလ်မှူးဖြစ်ရမည်။ အသက် (၄၂)မတိုင်မှီ ဒုတိယဗိုလ်မှူးကြီးဖြစ်ရမည်။ ဗိုလ်မှူးကြီးဖြစ်ပြီး နိုင်ငံတော်ကာကွယ်ရေး တက္ကသိုလ် တက်မှဗိုလ်မှူးချုပ်ဖြစ်မည် အစရှိသဖြင့်ကန့်သတ်ချက်အမျိုးမျိုးကြောင့် အရည်ချင်း ရှိပြီးစစ်ခေါင်းဆောင်များနှင့် မနီးစပ်သူများသည် တပ်မတော်တွင် ချောင်အထိုးခံရသည့် အနေအထား ဖြစ်စေခဲ့ ပါသည်။
           ဗိုလ်ချုပ်မှူးကြီးသန်းရွှေအနေဖြင့်တပ်မတော်အတွင်း အထက်ပိုင်း စစ်ခေါင်း ဆောင်များကိုထိန်းချုပ်ထားနိုင်ခြင်းကြောင့်ယနေ့ တပ်မတော်သည် အသုံးချခံရယုံ သာမက၊အရာရှိစစ်သည်မိသားစုများပါကျေးကျွှန်၊ စစ်ကျွန်သဖွယ် ခြေစုပ်လက်နယ် ပြုလုပ်ပေးရသည်မှာအစဉ်လာဖြစ်ခဲ့ရပါသည်။စစ်မြေပြင်တပ်များကို အမိန့်ပေးရာ တွင်လည်း ”ရေဘူးပေါက်တာမလိုချင်၊ရေပါတာဘဲလိုချင်“ဆိုသည့်စကားအရ တိုင်ရင်းသားနယ်မြေများ တွင်ရှင်းလင်းသွားဖိုးဟာအဓိက၊မုဒိန်းကျင့်ကျင့်၊လူသတ်သတ် လိုင်စင်ပေးထားသည့် သဘောဖြစ်လာပါသည်။တပ်မတော်အတွင်းတွင် လူသားစိတ်ရှိသောအရာရှိစစ်သည် များရှိသလိုလူသားစိတ်မရှိသောအရာရှိစစ်သည်များ အချို့လည်းရှိပါသည်။ တပ်မတော် အရာရှိစစ်သည်များကိုအရေးယူမှုမရှိခြင်း၊ တစ်ချိန်ကပြည်သူလူထု နှင့် တပ်မတော် စည်းရုံးရေးဌာနများကို ဖျက်သိမ်းလိုက်ခြင်းတို့သည်တပ်မတော်ကို ဗိုလ်ချုပ်သန်းရွှေ ကိုယ်တိုင် ဖျက်ဆီးနေခြင်း ပင်ဖြစ်လေသည်။
          ၂၀၀၀ခုနှစ်နောက်ပိုင်း သဘာဝဓါတ်ငွေ့ရောင်းရငွေမှ နိုင်ငံခြားငွေဒေါ်လာ ဘီလျံထောင်ချီရလာသောအခါတွင် ဗိုလ်ချုပ်သန်းရွှေသည် အဆိုပါငွေများကို ကိုယ်ပိုင်ငွေသဖွယ်စီမံခန့်ခွဲမှုများရှိလာပြီး တပ်မတော်အရာရှိစစ်သည်များ၏ သက်သာ ချောင်ချိရေးကိစ္စများကိုလစ်လျှူရှုကာ၎င်း၏မိသားစုရေးနှင့်အသက်အန္တရာယ် တို့ကိုသာ စိုးရိမ်ကြောင့်ာကမှုများထားပြီး၊ငွေကုန်ကြေးကြများသော လက်နက်ကြီးများ၊ ဒုံးပျံများ၊ နျူးကလီးယားလက်နက်များထုတ်လုပ်ရန်ဆောင်ရွက်လာခဲ့သလိုမြေအောက် လှိုင်ခေါင်း များတူးဖော်လာမှုအပေါ်တွင် ၄င်း၏တပည့် ဗိုလ်ချုပ်များ ပင်လျှင် နောက်ကွယ် တွင်ဝေဖန်မှုများရှိလာသည်ကိုတွေ့ရပါသည်။၎င်းတို့အနေဖြင့် ယခုလမ်းကြောင်းအတိုင်း ဆက်သွားနေလျှင်မြောက်ကိုရီးယားကဲ့သို့နိုင်ငံမျိုးဖြစ်လာ မှာဖြစ်ပြီးနိုင်ငံသာမကယင်းတို့ ကိုယ်တိုင်ပါဒုက္ခရောက်လာလိမ့်မည်ဟုယူဆလာကြ ပါသည်။သို့သော်တပ်မတော်တွင်း အစဉ်အလာအရအာခံရဲသူမရှိသဖြင့်ဗိုလ်ချုပ်သန်းရွှေလုပ်သမျှ ငြိမ်ခံနေရသည့်သဘောဖြစ် ပါသည်။
ဒေါ်အောင်ဆန်းစုကြည်နှင့်ပတ်သက်တပ်မတော်အတွင်းဝါဒဖြန့်ထားမှုများ
          ၁၉၈၈အရေးခင်းကာလတွင်း တပ်မတော်စိတ်ဓါတ်စစ်ဆင်ရေးဌာန အစီအမံဖြင့် စစ်ရုံးချုပ်မှ ဗိုလ်ချုပ်ကြီးတစ်ဦး (ဗိုလ်ချုပ်သန်းရွှေဟုယူဆရ) မှ ထိုစဉ်က တပ်မတော်ထောက်လှမ်းရေး ဒုတိယ ညွှန်ကြားရေးမှူးဒုတိယဗိုလ်မှူးကြိးသန်းထွန်း (နောင်ဘာရေးဒုတိယ၀န်ကြီးဗိုလ်မှူးချုပ်သန်းထွန်း) ကို ဒေါ်အောင်ဆန်းစုကြည်နှင့် ပတ်သက်ပြည်သူလူထုအတွင်း ဖြန့်ဝေရန်ညွှန်ကြားခဲ့ပါသည်။ အဆိုပါတာဝန်ကို ထောက်လှမ်းရေးဌာန ရုံးချုပ်မှ အရာရှိများမှ ဆောင်ရွက်ရန် ဒုတိယညွှန်ကြားရေးမှူး ကိုယ်တိုင်ညွှန်ကြားခဲ့ပါသည်။
          ၁၉၈၈အရေးခင်းကာလတွင်ဒေါ်အောင်ဆန်းစုကြည်နှင့်ပတ်သက်တပ်မတော် အတွင်းဝါဒဖြန့်မှုမှာ ဗမာပြည်ကွန်မြူနစ်ပါတီမှယူဂျီများသည်မြန်မာနိုင်ငံ အတွင်းပိုင်း သို့ရောက်ရှိနေကြပြီး ယင်းတို့ သည်မြေပေါ်ကွန်မြူနစ်ဝါဒသက်ဝင်းယုံကြည်သူများနှင့် ဆက်သွယ်ပြီး ဒေါ်အောင်ဆန်းစုကြည်အားဝန်းရံကာ နိုင်ငံတော်အာဏာကို ဖြတ်လမ်းနည်းမှ ရရှိအောင်ဆောင်ရွက်နေကြကြောင်း၎င်းတို့အာဏာရရှိပါက တပ်မတော်ကိုဖြိုခွဲလိမ့်မည် ဖြစ်ကြောင်း၊ထို့ကြောင့်ဒေါ်အောင်ဆန်းစုကြည်ကိုဆန့်ကျင်ရန်လိုကြောင်း ၀ါဒဖြန့်မှုများ ဆောင်ရွက်ခဲ့ကြပါသည်။ ၁၉၈၈အရေးခင်းပြီးဆုံးပြီးနောက်တွင် ဒေါ်အောင်ဆန်းစုကြည်အား အမေရိကန် နောက်လိုက်၊ အနောက်နိုင်ငံများ၏ အရင်းရှင်ဒီမိုကရေစီစနစ်ကို မြန်မာနိုင်ငံကို သွပ်သွင်းပြီး အရင်းရှင်နိုင်ငံကြီးများ အလိုရနယ်ချဲ့ လက်သစ်များမှ ကျွန်ပြုနည်းကို နည်းနာတစ်မျိုးနှင့်မြန်မာနိုင်ငံအားကျွန်ပြုရန်ဖြစ်ကြောင်း၊ထို့ကြောင့်၎င်းတို့အာဏာရ လာ ပါကတပ်မတော်၏ဒို့တာဝန်အရေး(၃)ပါးဖြစ်သောပြည်ထောင်စုမပြိုကွဲရေး၊ တိုင်းရင်းသား စည်းလုံးညီညွတ်ရေး၊ အချုပ်အခြာအာဏာတည်တံ့ခိုင်မြဲရေးတို့ကို ထိခိုက်မည်ဖြစ်ကြောင်း၊ ထို့ကြောင့်ဒို့တာဝန်အရေး(၃)ပါးကိုထိခိုက်အောင်လုပ်သူသည်တပ်မတော်၏ရန်သူဖြစ် သည် ဟု ၀ါဒဖြန့်ထိုးနှက်ခဲ့ပါသည်။
          ဒေါ်အောင်ဆန်းစုကြည်နှင့်ဆက်နွယ်ပြီးမြန်မာ့တပ်မတော်အတွင်းတွင် ဗိုလ်ချုပ် သန်းရွှေ အာဏာရလာပြီးသည့်အချိန်မှစဗိုလ်ချုပ်အောင်ဆန်း၏အခန်းကန္တကို တဖြေးဖြေးမှေးမှိန်အောင်စနစ်တကျစီမံဆောင်ရွက်ညွှန်ကြားခဲ့ပါသည်။ တပ်မတော် အတွင်း ဗိုလ်ချုပ်အောင်ဆန်း၏အခန်းကန္တနှင့်ပတ်သက်ဆွေးနွေးမှုများကို တပ်ချုပ်ဗိုလ်ချုပ်သန်းရွှေ ကမကြိုက်ဘူးဆိုသည့်စကားဖြင့် တပ်မတော် အတွင်းတွင် အာဇာနည်နေ့ပင်လျှင် အခန်းအနားများ ပြုလုပ်ခြင်းမရှိခဲ့ကြတော့ပါ။ တပ်မတော် အတွင်းလည်း ဒေါ်အောင်ဆန်းစုကြည် သည်ဗိုလ်ချုပ်အောင်ဆန်း၏သမီးဖြစ်သာ နာမည်ကြီး ကြောင်း အနောက်နိုင်ငံသား၏ လက်ထပ်ထိန်းမြားပြီးသား (၂)ဦးပင် ထွန်းကားနေပြီဖြစ်သောကြောင့် မြန်မာနိုင်ငံကိုချစ်သည်ဆိုသည်မှာမဟုတ်ကြောင်း၊ ၄င်းသည်အနောက်နိုင်ငံကြီးများ၏ အလိုရ မြန်မာ နိုင်ငံကိုအရင်းရှင်ဒီမိုကရေစီပုံစံကို သွပ်သွင်းနေကြောင်း တစ်နည်းအားဖြင့် ခေတ်သစ်ကျွန်ပြုနေခြင်းသာဖြစ်ကြောင်းကိုတပ်မတော်တွင်းအဆင့်ဆင့်မှ ဆွေးနွေးဟော ပြောမှုများပြုလုပ်ပြီး ဒေါ်အောင်ဆန်း စုကြည်ဆန့်ကျင်ရေးကို နည်းမျိုးစုံကျင့်သုံးခဲ့ပါသည်။
          ၁၉၉၆ခုနှစ်မှစဗိုလ်ချုပ်မှူးကြီးသန်းရွှေ သည် NLDချေမှုန်းရေးအပြင် ဒေါ်အောင်ဆန်းစုကြည်ဆန့်ကျင်ရေးကိုတပ်မတော်အတွင်းပြင်းပြင်းထန်ထန် ဆောင်ရွက် ခဲ့ပြီးအခေါ်အဝေါ်ကအစမိုက်မိုက်ရိုင်းရိုင်းခေါ်စေပြီးလုပ်ကြံဇာတ်လမ်း အမျိုးစုံဖန်တီးပြီး တိုက်ရိုက်ပုဂ္ဂိုလ်ရေးကိစ္စများကိုမဟုတ်မမှန်တပ်မတော်တွင်းသို့နည်းမျိုးစုံဖြင့် ၀ါဒဖြန့်ခဲ့ ပါသည်။နိုင်ငံတကာမှပေးသောဆုများနှင့်ပတ်သက်ဒေါ်အောင်ဆန်းစုကြည်သည် ၄င်းငွေ များကိုကိုယ်ကျိုးသုံးစွဲပြီးမြန်မာနိုင်ငံသားအကျိုးအတွက်ဘာမှလုပ်တာမရှိ ကြောင်း၊မြန်မာ နိုင်ငံသားများစားဝတ်နေရေးကြပ်တည်းစေရန်အတွက်ခရီးသွားများ မလာရန်နိုင်ငံတကာ အားလှုံဆော်ခြင်းနှင့်နိုင်ငံခြားရင်းနှီးမြှုပ်နှံမှုများကိုတားဆီးခြင်း ဖြင့်မြန်မာနိုင်ငံသားများ ဒုက္ခရောက်အောင်ဒေါ်အောင်ဆန်းစုကြည်မှဆောင်ရွက်နေကြောင်းဖြင့် တပ်မတော်တွင်း ၀ါဒဖြန့်မှုများ ပြုလုပ်ထားပါသည်။

ဒေါ်အောင်ဆန်းစုကြည်အပေါ်တပ်မတ်ာသားများ၏မျှော်လင့်ချက်
          ၁၉၈၈ခုနှစ် အရေးခင်းကာလတွင် တပ်မတော်အရာရှိ စစ်သည်များအနေဖြင့် ဗိုလ်ချုပ်အောင်ဆန်း၏သမီးတစ်ယောက်အနေဖြင့် မြန်မာနိုင်ငံပြုပြင်ပြောင်းလဲရေး  ကိစ္စကို ဆောင်ရွက်ပေးလိမ့်မည်ဟုမျှော်လင့်ခဲ့ကြပါသည်။သို့သော်ထိုအချိန်က တပ်မတော်အတွင်း ၀ါဒဖြန့်ချီမှုများကြောင့်၎င်း၊ ဒေါ်အောင်ဆန်းစုကြည်၏စိတ်နေ သဘောထားကိုလေ့လာရန် အချိန်တိုသောကြောင့်၎င်းမျှော်လင့်ချက်ကြီးစွာဖြင့် အားကိုးတကြီးမဖြစ်ခဲ့ကြပါ။အနီးကပ် အုပ်ချုပ်သောစစ်ခေါင်းဆောင်အဆင့်ဆင့်၏အမိန့်အောက်တွင်သာ လိုက်နာဆောင်ရွက်ခဲ့ကြ ပါသည်။
          ၁၉၉၅ခုနှစ်ဒေါ်အောင်ဆန်းစုကြည်နေအိမ်အကျယ်ချုပ်မှ လွတ်မြောက်လာပြီး ကာလ အချိန်တွင် တပ်မတော်အရာရှိ စစ်သည်များအနေဖြင့် စစ်ဗိုလ်ချုပ်ကြီးများ၏ ဒေါ်အောင်ဆန်းစုကြည်အပေါ်ဝါဒဖြန့်ချီထားမှုအပေါ် ယုံကြည်မှုကင်းမဲ့လာကြပါသည်။ ဒေါ်အောင်ဆန်စုကြည်၏ ခြံရှေ့ ဟောပြောပွဲများတွင် စစ်ရုံးချုပ်မှအရာရှိများပင် သွားရောက် နားထောင်လေ့ရှိကြပါသည်။ ထိုစဉ်က ဗိုလ်မှူးစိုးသိန်း (ရေ) (ယခုကာကွယ်ရေးဦးစီးချုပ် (ရေ) ဒုတိယဗိုလ်ချုပ်ကြီး (အငြိမ်းစား) နှင့် လက်ရှိ အမှတ် (၂)စက်မှုဝန်ကြီးဦးစိုးသိန်း) သည် နေ့စဉ်ရုံးဆင်းပြီးချိန်တွင် ဒေါ်အောင်ဆန်းစုကြည်၏ ဟောပြောမှုများကို အထက်လူကြီးများမသိအောင်ခိုးနားထောင်လေ့ရှိပါသည်။ဒုတိယဗိုလ်ချုပ်ကြီးစိုးသိန်း(ရေ) ကဲ့သို့တပ်မတော်အရာရှိများ ဒေါ်အောင်ဆန်းစုကြည် ၏ သြ၀ါဒကို နားထောင် လေ့ရှိပါသည်။
          ၁၉၉၅ခုနှစ်လောက်မှစတပ်မတော်အရာရှိများသည် ဗိုလ်ချုပ်သန်းရွှေ၏ ခေါင်းဆောင်မှုကို စိတ်ပျက်လာကြပါသည်။ တပ်မတော်သည် အထိန်းအကွပ်မရှိ ဗိုလ်ချုပ်ကြီးများကိုယ်တိုင်အကျင့်ပျက်လာကြသော်လည်း မည်သူတစ်ဦးတစ်ယောက် ကမျှဝင်ရောက်ဟန့်တားနိုင်ခြင်းမရှိပါ။ဗိုလ်ချုပ်ကြီးများကိုယ်တိုင် မိန်းမငယ်များ ထားခြင်း၊ ပျော်ပါးခြင်း၊ အဆမတန်လာဒ်စားခြင်းတို့အပြင် ယင်းတို့၏ မိသားစုများပါ လူမှုရေး၊ စီးပွားရေးကန္တများတွင် ၀င်ရောက်စွက်ဖက်ခဲ့ကြတပ်မတော်ထဲပျက်စီးနေပြီး တိုင်းပြည်လဲပျက်စီးတော့မယ်။ဒါကိုဒေါ်အောင်ဆန်းစုကြည်များကယ်တင်ထားနိုင် မလား လို့မျှော်လင့်မိတာအမှန်ပါ။သို့သော် ထိုအချိန်ကာလများတွင် တပ်မတော်အရာရှိ စစ်သည်များအနေဖြင့်အတိုက်ခံဖွဲ့စည်းများမှသိမ်းကြုံးအဆဲသာခံရပြီး မျှော်လင့်ချက် များ  ပျောက်ဆုံးခဲ့ပါသည်။
          တပ်မတော်အတွင်း အရာရှိကြီးများအပါဝင် စစ်သည်များသည် မြန်မာနိုင်ငံ တိုးတက်ရာ၊ တိုးတက်ကြောင်း၊ မြန်မာတပ်မတော်ဂုဏ်သိက္ခာရှိရာရှိကြောင်းအတွက် ဒေါ်အောင်ဆန်းစုကြည်သည်အရေးကြီးသည့်ပုဂ္ဂိုလ်ဖြစ်ကြောင်းကို ဗိုလ်ချုပ်သန်းရွှေ မှအပအားလုံးနားလည်ပါသည်။ဒေါ်အောင်ဆန်းစုကြည် အနေဖြင့် တပ်မတော်အရာရှိ စစ်သည်များကိုဗိုလ်ချုပ်သန်းရွှေ၏ကျေးကျွန်ဘ၀မှဆွဲထုတ်ရေး၊၄င်းတို့အား နည်း လမ်း ကောင်းများပေးလိမ့်မည်ဟု မျှော်လင့်ထားကြပါသည်။
          တပ်မတော်တွင်းအရာရှိစစ်သည်များအနေဖြင့် ဗိုလ်ချုပ်သန်းရွှေအားအာခံသည့် အခါတွင်၎င်းမှတစ်ဦးတစ်ယောက်သာမကအဖွဲ့စည်းလိုက်၊ မိသားစုဆွေမျိုးများအပါဝင် မျိုးဖြုတ်ပစ်တက်သည့်အတွက်တပ်မတော်အရာရှိစစိသည်များသည် အကြောက်တရား ဖြင့် စံပြအပစ်ပေးခံရပါသည်။ မကြောက်ရဟုဆိုသော်လည်း ကာယကံရှင်အနေဖြင့် လုပ်နိုင်သော်လည်းသားသမီးများဒုက္ခရောက်ကြမည်စိုးအာမခံရဲပါ။ ထို့ကြောင့်အာခံ ရဲအောင်သတ္တိများမွေးပေးနိုင်မည့်နည်းလမ်းကောင်းများကို ဒေါ်အောင်ဆန်းစုကြည်ထံ မှ မျှော်လင့်နေကြပါသည်။
          တပ်မတော်အရာရှိစစ်သည်များသည် ဗိုလ်ချုပ်သန်းရွှေ မှိုင်းသွင်းထားသော ၀ါဒဖြန့်အကြောင်း အရာများကို ချေဖျက်လိုကြပါသည်။ တိုင်းရင်းသားလူမျိုးများကို ရန်သူများဟုသတ်မှတ်ထားခြင်း ကျောင်းသားများကို ကွန်မြူနစ်များဟုသတ်မှတ် ထားခြင်းအနောက်ဒီမိုကရေစီအင်အားစုများကို နယ်ချဲ့လက်သစ်ဟုသတ်မှတ်ထားခြင်း သံဃာများကိုဘုန်းကြီးအတုများဟုဝါဒဖြန့်ထားကြပါသည်။ အဆိုပါ နေ့တိုင်းရွတ်ဆိုနေရပါသည်။ ၄င်းတို့ ၏ဦးနှောက်သည် စက်ရုပ်တွေလို စေခိုင်းခြင်းခံနေရသောသဘောမျိုးဖြစ်ပါသည်။ ဒီမိုကရေစီ ဆိုသောစကားလုံးကိုလည်း နယ်ချဲ့လက်သစ်ဟု ဗိုလ်ချုပ်သန်းရွှေမှဝါဒဖြန့်ထားပါသည်။ ထို့ကြောင့် အဆိုပါ အကြောင်းအရာ (၂)ခုအား ဘယ်ဟာကောင်းသည်၊ ဆိုးသည်ကို ကွဲကွဲပြားပြား တပ်မတော် သားများနားလည်သဘောပေါက်အောင် ဒေါ်အောင်ဆန်းစုကြည်မှ ရှင်းလင်းလိမ့်မည့်ဟု မျှော်လင့်ပါ သည်။
          တပ်မတော်အရာရှိစစ်သည်များအနေဖြင့်မြန်မာနိုင်ငံပြုပြင်ပြောင်းလဲရေး ကိစ္စ များတွင် ဒေါ်အောင်ဆန်းစုကြည်သည် အဓိကအရေးပါသောသူ တစ်ဦးအဖြစ် နားလည်သဘောပေါက်သလို တပ်မတော်အဖွဲ့အစည်း၏ ထောက်ခံမှုမရလျှင်လည်း မြန်မာနိုင်ငံပြောင်းလဲရေးအတွက် များစွာ အခက်အခဲရှိမည်ဟု ယုံကြည်ကြပါသည်။ ထို့ကြောင့် ဒေါ်အောင်ဆန်းစုကြည်အနေဖြင့် တပ်မတော် အင်အားစုကို စည်းရုံးလိမ့်မည်ဟု မျှော်လင့်စောင့်စားလျက်ရှိနေကြပါသည်။
အကြောင်းအရာ များအတွက် တပ်မတော်နှင့် အတိုက်ခံများအကြား နားလည်မှုတစ်စုံတစ်ရာ ရရှိရန် ညှိနှိုင်းပေးနိုင်သူမှာဒေါ်အောင်ဆန်းစုကြည်တစ်ဦးတည်းသာ ဖြေရှင်းပေးနိုင်လိမ့်မည်ဟု မျှော် လင့်ပါသည်။
          တပ်မတော်အရာရှိစစ်သည်များ အနေဖြင့်မြန်မာနိုင်ငံသည် ဒီမိုကရေစီရလျှင် ကောင်းမည်ဟု ယေဘူယျနားလည်ပါသည်။ သို့သော်၎င်းတို့၏ဦးနှောက်ထဲတွင် အထက်မှပေးအပ်သောအမိန့်နှင့်တာဝန်များကို ကျေပွန်စွာထမ်းဆောင်ပါမည်ဟူသော သစ္စာကို 
         လွတ်မြောက်လိုနေကြပါသည်။မည်သူတစ်ဦးတစ်ယောက်ကမျှ စစ်သည်နှင့်မိသားစုများ သည်ကျွန်၊ကျွန်သဘောက်များအဖြစ်မနေလိုကြပါ။နိုင်ငံတကာတွင် ရှိကြသောတပ်မတော် များ ကဲ့သို့ဂုဏ်သိက္ခာရှိရှိနေလိုကြပါသည်။ အစစအရာရာ ချွတ်ခြုံကြနေကြပြီး စားရေး၊ ၀တ်ရေး၊နေရေးဒုက္ခအပေါင်းမှလွတ်မြောက်ချင်ကြပြီ ဖြစ်ပါသည်။ထို့ကြောင့်တပ်မတော် အရာရှိစစ်သည်များ၊ စစ်ကျွန်ဘ၀မှလွတ်မြောက်ရေး အတွက်နည်းလမ်းကောင်းများကို ဒေါ်အောင်ဆန်းစုကြည်မှ ပေးလိမ့်မည်ဟု မျှော်လင့် ပါသည်။
အကြံပြုတင်ပြခြင်း
          တပ်မတော်တွင် အရာရှိစစ်သည်အားလုံးသည် နံနက်တစ်ခါ၊ ညနေတစ်ခါ ရုံးဖွင့်ရက်တိုင်းတွင် တပ်မတော်အရာရှိစစ်သည်များသည်ဗိုလ်ချုပ်သန်းရွှေ၏ကျေးကျွန်၊ စစ်ကျွန်ဘ၀မှ
အောက်ပါသစ္စာလေးချက်ကိုဆိုရပါသည်။
(၁)     ငါတို့သည် နိုင်ငံတော်နှင့်နိုင်ငံသားတို့၏ သစ္စာကိုစောင့်သိရိုသေပါမည်။
(၂)     ငါတို့သည်ကျဆုံးလေပြီးသောတပ်မတော်သားတို့၏သစ္စာကို စောင့်သိရိုသေ ပါမည်
(၃)     ငါတို့သည်အထက်မှပေးအပ်သောအမိန့်နှင့်တာဝန်ကို ကျေပြွန်စွာထမ်းဆောင် ပါမည်။
(၄)     ငါ့နိုင်ငံတော်၊ ငါ့နိုင်ငံသား၊ ငါ့တပ်မတော်အတွက် ငါ၏အသက်ကိုစွန့်လွှတ်ရန် အဓိဌာန်ပြုပါ၏။
          တပ်မတော်အရာရှိ စစ်သည်များအား ၄င်းတို့ရွတ်ဆိုနေသော သစ္စာ(၄)ချက်၏ အဓိပ္ပါယ်ကိုပီပြင်အောင်ရှင်းပြဖို့လိုပါသည်။အမှတ်(၁)အချက်သည်တပ်မတော်ဆိုသည် မှာ မြန်မာနိုင်ငံသား၊မြန်မာလူမျိုးတိုင်းရင်းသားညီအစ်ကိုမောင်နှမများအပေါ် သစ္စာရှိ ရပါမည်။ ဗိုလ်ချုပ်သန်းရွှေနှင့် မိသားစုအပေါ် သစ္စာရှိရမည်မဟုတ်ဆိုသော အချက်ကို ရှင်းလင်း ပြောကြား သင့်ကြောင်း အကြံပြုလိုပါသည်။ အမှတ်(၂)အချက် တွင်ယခင်က ဗိုလ်ချုပ်အောင်ဆန်း နှင့်တစ်ကွကျဆုံးလေပြီးသောဟုဆိုခဲ့ရသော်လည်း ဗိုလ်ချုပ် သန်းရွှေအမိန့် နှင့် ဗိုလ်ချုပ်အောင်ဆန်း၏အမည်ကို ဖြုတ်ခဲ့၇ပါသည်။ အမှန်တကယ် ကျဆုံးလေပြီးသော တပ်မတော်သားဆိုသည်မှာ ဗိုလ်ချုပ်အောင်ဆန်းအပါဝင် နိုင်ငံ တော်အတွက်ကျဆုံးသွားသော ရဲဘော်များကို ဆိုလိုခြင်းဖြစ်ပါသည်။ အဆိုပါကျဆုံး ရဲဘော်များ နိုင်ငံ တော်အတွက်အသက်ပေးသွားခြင်းသည် ယနေ့ဗိုလ်ချုပ်သန်းရွှေ၏ စစ်ကျွန်ပြုလုပ်ရန်မဟုတ်ကြောင်းကိုရှင်းလင်းပြောကြားသင့်ကြောင်းအကြံပြုလိုပါ သည်။ အမှတ်(၃)အချက်သည်ယနေ့တပ်မတော်ကိုဗိုလ်ချုပ်သန်းရွှေကြိုးကိုင်နေသည့် အဓိက အချက်ဖြစ်ပါသည်။အထက်မှအမိန့်ပေးလျှင် ဘာခိုင်းခိုင်း လုပ်ရမည် ဟူသောအချက် ဖြစ်သည်။ တပ်မတော်အရာရှိစစ်သည်များအနေဖြင့် အဆိုပါအမှတ် (၃) အချက်ဖြင့် တရားသည်ဖြစ်စေ၊မတရားသည်ဖြစ်စေလုပ်ရမည်ဟုခံယူနေကြပါသည်။ အမှန်တကယ် အဆိုပါအချက်သည်နိုင်ငံတော်နှင့်နိုင်ငံသားတို့ သစ္စာစောင့်သိ၍ ရိုသေပါမည်ဟူသော အချက်နှင့်ဆက်စပ်နေပါသည်။ဆိုလိုသည်မှာ နိုင်ငံတော်နှင့် နိုင်ငံသားတို့ထိန်းသိမ်း လိုက်နာရသော ဥပဒေနှင့် ညီသောအမိန့်၊ အထက်မှအမိန့်ကိုသာ တပ်မတော်သားတို့ လိုက်နာဖို့လိုပါသည်။လူသတ်လို့အမိန့်ပေးတာကိုတပ်မတော်သားတစ်ယောက် အနေဖြင့် လိုက်နာရန်မလိုကြောင်း၊မတရားသောအမိန့်ကိုလိုက်နာရန်မလိုကြောင်း တို့ကိုရှင်းလင်း ပြောကြားသင့်ကြောင်းအကြံပြုလိုပါသည်။အမှတ်(၄)အချက်သစ္စာသည် အားလုံး၏ အချုပ်ဖြစ်သည်။ တပ်မတော်သားများသည် နိုင်ငံတော် နိုင်ငံသားတို့ အတွက်သာ အသက်စွန့်သင့်ပါသည်။ ဗိုလ်ချုပ်သန်းရွှေနှင့် မိသားစုအတွက် မိမိနိုင်ငံတိုင်းရင်းသား များနှင့်တိုက်ပွဲဖြစ်ရင်းပြည်သူလူထုကိုနှိပ်စက်ရင်းအသက်မစွန့်သင့်ပါတို့ကို အကြံပြုလိုပါ သည်။ အဓိကအနေဖြင့် အကြံပြုလိုသည်မှာ နေ့စဉ်စစ်သည်တို့ဆိုနေရသော သစ္စာ (၄)ချက်ကိုအဓိပ္ပါယ်ဘာလဲဆိုတာကို နားလည်သဘောပါက်လာလျှင်တပ်မတော်သား တို့သည်အာဏာရှင်စနစ်ကိုတွန်း လှန် ရန် တဖြေးဖြေးစိတ်ဓါတ်များနိုးကြးလာလိမ့်မည်ဟု အကြံပြုပါသည်။
          တပ်မတော်သည်အစုအဖွဲ့လိုက်နေရသော အဖွဲ့စည်းဖြစ်သောကြောင့် တစ်စုံ တစ်ခုကိုမကျေနပ်သော်လည်းတစ်ခုခုကိုဆောင်ရွက်ရန်အတွက် တစ်ဦးမျက်နှာတစ်ဦး ကြည့်ပြီးသူကိုယ်မယုံကိုယ့်သူမယုံစိတ်များဖြစ်တတ်ပါသည်။တစ်ခုခုလုပ်လိုက်၍ တစ်စုံ တစ်ဦးကသွားတိုင်လျှင်မိသားစုပါဒုက္ခရောက်ရလိမ့်မည်ဟုစိုးရိမ်ကြောင့်ကြမှုရှိ တတ်ကြ ပါသည်။ထို့သို့စိုးရိမ်မှုများကပျောက်စေရန်အတွက်တပ်မတော်မိသားစုများနှင့် တပ်မတော် သားများအနေဖြင့်ပြည်ပအသံလွင့်ဌာနမှထုတ်လွင့်ချက်များသည်အများ ကြီးထိရောက် ပါသည်။သို့သော်တပ်တွင်း၌ထိုအသံလွင့်ချက်များကိုလွတ်လွတ်လပ်လပ် နားထောင်ခွင့် မရှိပါ၊ထိုသို့နားထောင်နိုင်ရန်အတွက်၎င်းတို့အနေဖြင့်ရေဒီယိုအသေးစား တစ်လုံးကိုပင် ကိုယ်ပိုင်မ၀ယ်နိုင်သောအခြေအနေရှိပါသည်။သို့ဖြစ်ပါ၍တပ်မတော်တွင်းစိတ်ဓာတ်စစ်ဆင်ရေးတန်ပြန်ဆောင်ရွက်နိုင်ရန်အတွက်စစ်တပ်အတွင်းရေဒီယိုများကိုအခမဲ့လျှိုဝှတ်နည်းများဖြင့်ဖြန့်ဝေသင့် ကြောင်းအကြံပြုပါသည်။
          စစ်တပ်တွင်းပြည်ပအသံလွင့်ဌာနများမှသတင်းများကိုနားမထောင်ရအမိန့်ထုတ်ထား သော်လည်းဗိုလ်ချုပ်ကြီးမှစစ်သည်အထိ အားလုံးခိုးနားထောင်ကြပါသည်။ တပ်မတော် အတွင်းစစ်သည်များအားစိတ်ဓာတ်စစ်ဆင်ရေးလုပ်ရန်အကောင်းဆုံးနည်းမှာသတင်းဌာနများမှဖြစ်လေသည်။သို့သော်သတင်းဌာနများတွင်စိတ်ဓာတ်စစ်ဆင်ရေးမဟာဗျူဟာနည်းဗျူဟာကျကျစနစ်တကျဖွဲ့စည်းဆောင်ရွက်သင့်ပါသည်။ပေါ်ပင်သတင်းများသာထုတ်လွှင့်ပါက ထိရောက်မှုအားနည်းပေလိမ့်မည်။ထိုကဲ့သို့အသံလွှင့်ဌာနများကို ပံ့ပိုးကူညီရန်အတွက် ပြည်တွင်းစစ်တပ်နှင့်ပတ်သက်အချက်လက်များစုဆောင်းပေးပို့ခြင်းဖြင့် ဟန်ချက်ညီ တပ်တွင်း စိတ်ဓါတ်စစ်ဆင်ရေးပြုလုပ်သင့်ကြောင်း အကြံပြု ပါသည်။
          တပ်မတော်တွင်း အများစုဖြစ်သော စစ်သည်များ၏ အဓိကလိုအပ်ချက်သည် စားဝတ်နေရေး၊ ပညာရေး၊ ကျန်းမာရေးဖြစ်ပါသည်။ ယနေ့တပ်မတော်အတွင်း ဖြစ်ပေါ်နေသော ပြသနာသည် မိသားစု များ၏စားဝတ်နေရေး ပြသနာဖြစ်ပါသည်။ စစ်တပ်အကြီးအကဲများအနေဖြင့် တပ်များကိုအဆမတန် အင်အားချဲ့ထွင်ပြီး စစ်သည်များကို ထောက်ပံ့မှုလုပ်ပေးနိ်ုင်ခြင်းမရှိ ဖြစ်နေပါသည်။ တပ်မတော် အကြီးအကဲကိုယ်တိုင်မှ “ကိုယ့်ရိက္ခာ၊ကိုယ်ရှာစား“ ပေါ်လစီကိုချမှတ် ကျင့်သုံးသည့်အတွက် နယ်စပ်ဒေသ စီးပွားရေးကောင်းသော တပ်များမှလွဲမြို့များရှိတပ်များအပါအ၀င် ရှေ့တန်းတပ်များ အားလုံးဒုက္ခရောက်ကြပါသည်။ ထို့ကြောင့်ယနေ့ဖြစ်ပေါ်နေသော တပ်တွင်းမိသားစု၏ စားဝတ်နေရေးဒုက္ခရောက်နေမှုကိုမီးမောင်းထိုးပြပြီး စစ်သည်များ၏မကျေနပ်မှုများ ကိုစုစည်းပြီးပွင့်အန်လာစေရန်အတွက်စိတ်ဓါတ်စစ်ဆင်ရေးပြုလုပ်ပြီး နှိုးဆွစေသင့်ကြောင်း အကြံပြု တင်ပြအပ်ပါသည်။
          ယနေ့အချိန်အခါတွင်တပ်မတော်အတွင်းအရာရှိအချင်းချင်း၊ စစ်သည်အချင်းချင်း တို့၏ဆင်းရဲချမ်းသာတော်တော်ကွာခြားနေပြီဖြစ်ပါသည်။အထူးသဖြင့် ဗိုလ်ချုပ်ကြီးများ ၏မိသားစုပိုင်ဆိုင်မှုသည် အဆပေါင်းမြောက်များစွာကွာခြားနေကြပါသည်။ စစ်သည် တစ်ဦးသည် ဗိုလ်ချုပ်ကြီးများအိမ်မွေးထားသောသတ္တ၀ါလေးတစ်ကောင်လောက်ပင် တန်ဖိုးမထားကြပါ။ ထို့ကြောင့်စစ်သည်များစုပေါင်းတောင်းဆိုကာ၊ မကျေနပ်မှုများ ကိုဖွင့်ပြောရဲလာရန် အထက်နှင့်အောက်ညှိနှိုင်းပေါင်းစပ်မှုများကို များများပြောပေးဖို့လို ပါသည်။ စစ်သည်တစ်ဦးမှ (၁၀)ယောက်၊ တပ်ရင်းတစ်ရင်းမှ (၁၀)ရင်း၊ တပ်မ တစ်ခုမှ (၁၀)ခုအစရှိသဖြင့် စစ်တပ်အတွင်းမကျေနပ်မှုများကို ဖွင့်ထွက်လာအောင် နှိုးဆွပေးပြီး ပြည်သူလူထုဘက်သို့ ကူးပြောင်းစေရေး အကြံပြုအပ်ပါသည်။
          နိဂုံးချုပ်အနေဖြင့် တင်ပြလိုသည်မှာ တပ်မတော်ဆိုသည်မှာ ဒီမိုကရေစီမရှိသော အဖွဲ့စည်း ဖြစ်သည်။ အမိန့်နာခံရမည်ဆိုပြီး လက်နက်နှင့်မိုးအုပ်ချုပ်ခံရသော အဖွဲ့စည်းဖြစ်ပါသည်။အထူးသဖြင့်အောက်ခြေစစ်သည်အများစုသည်အခြေခံ ပညာနည်း သောသူများဖြစ်ကြပါသည်။နိုင်ငံရေးစကားလုံးများကိုနားလည်သဘော ပေါက်မှုအားနည်း ကြပါသည်။၎င်းတို့အားဒဲ့ဒိုးပြောမှန်လျှင်မှန်သည်မှားလျှင်မှားသည် ကိုပြတ်ပြတ်သားသား ပြောဖို့လိုပါသည်။စစ်သည်တို့၏အသဲနှလုံးသည်ယင်းတို့၏ ဇနီးသားသမီးများပေါ်တွင် သာရှိပါသည်။အလားတူအရာရှိများအနေဖြင့်မှစစ်သည်များ ထက်စာလျှင်ပညာတက် ကြပါသည်။စစ်သည်များအားစည်းရုံးနိုင်စွမ်းသည် အရာရှိများ ပေါ်တွင် တည်ပါသည်။ အရာရှိများကိုပညာပါပါ နားလည်အောင်အခြေအနေများကို ပြောကြားသင့်ပါသည်။ တပ်မတော်တွင်အရာရှိဖြစ်စေ၊စစ်သည်ဖြစ်စေ၊ငါ့အသက် တောင်စွန့်လွှတ်နိုင်တာပဲဟု အတွေးအခေါ်ရှိပါသည်။ပြောချင်သည်မှာအကြမ်းနည်းဖြင့် ၄င်းတို့အားဆက်ဆံလာမည် ဆိုပါက လက်ခံလိမ့်မည်ဟု မယုံကြည်ပါ။ ထို့ကြောင့် စစ်သည်တို့အပေါ် ဆဲဆိုမှုကို ရှောင်ကြဉ်သင့်ကြောင်း အကြံပြုအပ်ပါသည်။


နေ့စွဲ။  ၂၀၁၁ခုနှစ် ဇန်န၀ါ၇င်္ီလ (၁)ရက်                                       
နေရာ။  ၀ါရှင်တန်ဒီစီမြို့



No comments:

Post a Comment