Shwe Dagon

Shwe Dagon

Friday, May 2, 2014

တပ်မတော် နှင့် တိုင်းရင်းသားလက်နက်ကိုင်အဖွဲ့များ အရေး

 



တပ်မတော် နှင့် တိုင်းရင်းသားလက်နက်ကိုင်အဖွဲ့များ အရေး
ဆောင်းပါးရှင်၊ အောင်လင်းထွဋ်
လွန်ခဲ့သော နှစ်ပေါင်း(၂၀)နီးပါးစစ်ပွဲများကင်းစင်ပြီး ငြိမ်းချမ်းတည်ငြိမ်ခဲ့သော ပြည်ထောင်စုမြန်မာနိုင်ငံတော် သည်လက်ရှိမြန်မာနိုင်ငံအရပ်သားအစိုးရအသစ်ဟုခေါ်သောအစိုးရလက်ထက်တွင် စစ်၏အနိတ်ဌာရုံသတင်း များကိုကြားနေရပါသည်။ အထူးသဖြင့် ကချင်၊ ကရင်။ ရှမ်း ပြည်နယ် ဒေသများတွင် စစ်ပွဲများဖြစ်နေကြပါ သည်။ တရုပ်နိုင်ငံ၏ ကျောထောက်နောက်ခံပြုထားသော ကိုးကန့်ငြိမ်းချမ်းရေးအဖွဲ့ ကို ၂၀၀၉ ခုနှစ်က စစ်တပ်အနေဖြင့် နယ်ခြားစောင့်တပ်ကိုလက်မခံ၍ တိုက်ခိုက်ခဲ့သောလည်း တရုပ်အစိုးရ၏ ပြင်းထန်သော ဖိအားကြောင့် စစ်ပွဲကိုရပ်ဆိုင်းခဲ့ရပြီး စစ်အစိုးရ ဒုတိယ နှင့် တတိယ ခေါင်းဆောင်များဖြစ်ကြသော ဒုတိယဗိုလ်ချုပ်မှူးကြီးမောင်အေး ၊ ဗိုလ်ချုပ်ကြီးသူရရွှေမန်း တို့ကိုယ်တိုင် ရက်ပိုင်းအတွင်းတရုပ်နိုင်ငံသို့ သွားရောက် ၍မှားပါကြောင်းဝန်ချတောင်းပန်ခဲ့ရပါသည်။ လက်ရှိအချိန်တွင်မူ ကချင်၊ ကရင်။ ရှမ်း ငြိမ်းချမ်းရေး အဖွဲ့များကို စစ်တပ်အနေဖြင့်ပြင်းပြင်းထန်ထန် စစ်ပွဲဆင်နွဲနေသောလည်း တရုပ်နိုင်ငံ ထောက်ခံထားသော မူးရစ်ဆေးဝါးနှင့်စစ်အင်အားကြီးထွားလာသော ”ဝ“ နှင့် ”ရှမ်းအခါ“ ငြိမ်းချမ်းရေး အဖွဲ့များ ကိုမူ စစ်ဆင်ရေးမလုပ်ရဲခဲ့ပါ။ ထို့အပြင် ဗိုလ်ချုပ်မှူးကြီးသန်းရွှေ ၏ လက်ရင်းတစ်ပည့်များဖြစ်ကြသော လွှတ်တော်ဆပ်ကော်မတီ ဥက္ကဌများဖြစ်ကြသော ဝန်ကြီးဟောင်းများဖြစ်ကြသည့် ဦးအောင်သောင်း နှင့် ဦးသိန်းဇော် တို့ခေါင်းဆောင်သော သမ္မတ၏အစိုးရကိုယ်စလှယ်အဖွဲ့ကို “ဝ”နှင့်မိုင်းလားဒေသ သို့စေလွှတ်ခဲ့ရပါသည်။ အဆိုပါဆွေးနွေးမှုမှနေ၍ ပစ်ခတ်တိုက်ခိုက်မှု မဖြစ်အောင် ဆက်လက်ထိန်းသိမ်းရေး၊ အပြန်အလှန်စကားပြောနိုင်ရန်ဆက်ဆံရေးဌါနစခန်းများဖွင့်လှစ်ရေး၊ ယခင်နှစ်ဦးနှစ်ဘက်သဘောတူညီ ခဲ့ပြီးဖြစ်သောနယ်မြေမှကျောလွန်ပြီး လက်နက်ကိုင် သွားလာသည့်အခါ ကြိုတင်ညှိနှိုင်းဆောင်ရွက်ရေး၊ နှစ်ဦးနှစ်ဘက်သဘောတူညီသည့်အချိန်နေရာတွင်ဆက်လက်ညှိနှိုင်းဆွေးနွေးသွားရေး ၊စသည့်အချက်(၄)ချက် ကို ”ဝ“ နှင့် ”ရှမ်းအခါ“ ငြိမ်းချမ်းရေး အဖွဲ့များဖြင့် သဘောတူညီခဲ့ကြပါသည်။
အဆိုပါသဘောတူညီချက်ကို အစိုးရဘက်မှ ရှမ်းပြည်နယ်အစိုးရအဖွဲ့၏ နယ်စပ်လုံခြုံရေးဝန်ကြီး ဗိုလ်မှူးကြီး အောင်သူ ၊ တြိဂံတိုင်းစစ်ဌာနချုပ်စစ်ဦးစီးမှူး ပထမတန်း ဒုတိယဗိုလ်မှူးကြီးဇော်ထွန်းမြင့်၊ ရှမ်းပြည်နယ်အစိုးရ အဖွဲ့၏ ပြည်နယ်ဥပဒေချုပ် ဦးမောင်မောင်၊ ရှမ်းပြည်နယ်နယ်စပ်ဒေသဖွံ့ဖြိုးရေးမှူး ဦးအောင်ကျော်မြင့် တို့က လက်မှတ်ရေးထိုးခဲ့ပြီး “ဝ” ဘက်မှ ဦးကျောက်ကွမ်းအမ်း၊ ဦးပေါက်ယူလျန်၊ ဦးအောင်မြင့် ၊ မိုင်းလားအဖွဲ့မှ ဦးစံပေ့၊ ဦးခန်းပောင်၊ ဦးအိုက်ရှဲန်၊ ဦးဇင်ခမ်းနော် တို့က လက်မှတ်ရေးထိုးခဲ့ကြပါသည်။ ၂၀၀၉ ခုနှစ်က နယ်ခြားစောင့်တပ်ကိုလက်မခံလျှင် ”ဝ“ နှင့် ”ရှမ်းအခါ“ ငြိမ်းချမ်းရေး အဖွဲ့များ စစ်ရေးအရဆောင်ရွက်လိမ့်မည် ဟုခြိမ်းခြောက်ပြောဆိုခဲ့သောလည်း ယနေ့အချိန်အခါတွင် ကချင်၊ ကရင်။ ရှမ်း ငြိမ်းချမ်းရေးအဖွဲ့များ ကိုတော့ စစ်ရေးအရပြင်းပြင်းထန်ထန်အရေးယူခဲ့သောလည်း ”ဝ“ နှင့် ”ရှမ်းအခါ“ ငြိမ်းချမ်းရေး အဖွဲ့များ ကိုမူ ငြိမ်းချမ်းရေး စာချုပ်ချုပ်ခဲ့သည်။”ဝ“ နှင့် ”ရှမ်းအခါ“ ငြိမ်းချမ်းရေး အဖွဲ့များသည် ကေအိုင်အေ နှင့် အပြန်အလှန် အကူညီပေးရေး သဘောတူညီထားခဲ့သောလည်း ဂတိဂဝတ်ကို ချိုးဖေါက်ပြီး အစိုးရနှင့်ပူးပေါင်းခဲ့သည်ကိုတွေ့ ရမည်ဖြစ်ပါသည်။
ပြည်ထောင်စုမြန်မာနိုင်ငံ၏ အဓိကလူမျိုးကြီးများဖြစ်သော ကချင်၊ ကယား၊ ကရင်၊ ချင်း၊ မွန်၊ ဗမာ၊ ရခိုင်၊ ရှမ်း တို့၏ တည်ငြိမ်အေးချမ်းမှုကို ကိုတော့လစ်လျူရှုထားပြီး တရုပ်နိုင်ငံအတွင်းအများစုနေထိုင်သော “ဝ“ နှင့် အခါ လူမျိုးများအရေး ငြိမ်းချမ်းရေးဆောင်ရွက်နေသည်မှာတော့ အစိုးရအနေဖြင့်ရိုးသားမှုမရှိသည်မှာထင်ရှားနေပါ သည်။ယနေ့မြန်မာနိုင်ငံသည် လွတ်လပ်၍တက်ကြွသောသောနိုင်ငံခြားရေးပေါ်လစီ ကို ကျင့်သုံးနေသည် ဟု ဆိုသော်လည်းတရုပ်နိုင်ငံ၏ကိုလိုနီကျွန်နိုင်ငံ ဘဝသို့ရောက်မှန်းမသိရောက်နေရပါပြီ၊ ပြည်တွင်းအရေးကိစ္စများ ကိုပင် တရုပ်တို့၏မျက်နှာကြည့်ပြီး အစိုးရအသစ်အနေဖြင့် အလုပ်လုပ်နေရသည်မှာ ရင်နာစရာကောင်းလှ ပေသည်။ ယခုအချိန်ကြကာမှ တရုပ်တို့ကိုချိန်ခွင်ရှာညှိနိုင်အောင် အနောက်နိုင်ငံများနှင့် ပလူးပလဲ လိုက်လုပ်နေရသည်မှာလည်း ရှက်ဖို့ကောင်းပါသည်။ နိုင်ငံ၏အင်အားသည်ပြည်တွင်းမှာသာရှိသည်ဟူ၍ အကြိမ်ကြိမ်ကြွေးကြော် နေသောစစ်ဗိုလ်ကြီးများ ဘာဖြစ်လို့ ကိုယ့်သွေးရင်းသားချင်းစစ်ပြန်တိုက်နေကြပါသလဲ ဟုမေးလိုပါသည်။ လွန်ခဲ့သော အနှစ် (၂၀) နီးပါး ငြိမ်းချမ်းခဲ့ပြီးမှ ယနေ့လို တပ်မတော် ၊ တိုင်းရင်းသားလက်နက်ကိုင်အဖွဲ့များ၊ ပြည်သူလူထုများ ဘေးဒုက္ခရောက်အောင် လုပ်နေရပါသလဲ၊ ကိုးကန့်၊ ဝ ၊ အခါ လူမျိုးများကိုတောင် နားလည်မှုပေးနိုင်ရင် မူရင်းလူမျိုးတွေဖြစ်သည့်  ပင်လုံစာချုပ်နှင့်လွတ်လပ်ရေးအတူ ရယူခဲ့ကြသည့် တိုင်းရင်းသားတွေကိုရော ဘာဖြစ်လို့ “ဝ“ နှင့် အခါ လူမျိုးတွေလို သဘောတူညီချက်မျိုးမားလဲမှုမပေးနိုင်သလဲဆိုတာကို မေးလိုပါသည်။
စာရေးသူအနေဖြင့် စစ်ဝတ်စုံဝတ်၍ နှစ်ပေါင်း (၂၅) နှစ်ခန့် ၊ စစ်ဝတ်စုံချွတ်၍ နှစ်ပေါင်း (၅)နှစ်ကျော် မဆလ အစိုးရ နှင့် စစ်အာဏာရှင်အစိုးရ လက်ထက်တွင် အမှုထမ်းခဲ့ရသူတစ်ဦးဖြစ်ပါသည်။ အထူးသဖြင့် တိုင်းရင်းသားလက်နက်ကိုင်များ ကိစ္စ ကို နှစ်အတန်ကြာတာဝန်ထမ်းဆောင်ခဲ့ရပါသည်။ စာရေးသူတို့နားလည် ခဲ့သည်မှာ  တပ်မတော်သားတိုင်းဟာ စစ်တပ်မှာစတင်ဝင်ရောက်အမှုထမ်းစဉ်ကတည်းက အလံကိုကိုင်ပြီး သစ္စာပြုခဲ့ကြသူတွေပါ။ ဘယ်လို သစ္စာလဲလို့အကျဉ်းချုပ်ပြောရရင် တပ်မတော် သည် တိုင်းရင်းသား ပြည်သူလူထု၏ အသက်အိုးအိမ်စည်းစိမ် ကို ကာကွယ်စောင့်ရှောက်ရန်ဖြစ်ပြီး ကိုယ့် တိုင်းရင်းသားခြင်း နှိပ်စက်သတ်ဖြတ်ဖို့မဟုတ်သလို၊ လူတစ်စုတစ်ဖွဲ့အတွက် အသုံးချဖို့ ဖွဲ့စည်းထားသော အာဏာရှင်၏ တပ်မတော်လဲမဟုတ်ပါ။ စစ်ပွဲတွေဖြစ်ပြီဆိုရင် နှစ်ဘက်လက်နက်ကိုင်အဖွဲ့ဝင်များ ကျဆုံးရသလို အပြစ်မဲ့ပြည်သူတွေအနေဖြင့်လည်း ဒုက္ခရောက် စစ်ဘေးစစ် ဒဏ်ခံရစမြဲပါ။ စစ်ပွဲတွေ မှာ သေကြရတာက တပ်မတော်ဘက်မှာဆိုရင် အရာရှိအငယ်တွေ နဲ့ အခြားအဆင့်လို့ခေါ်သည့် အရာခံ၊ အကြပ်၊ တပ်သားတွေ အများစုပါ။ အရာရှိကြီးတွေသေတယ်ဆိုတာ တော်တော်နည်းပါသည် ဒိအပြင် အာဏာရှင်ကြီးများ၏ ဆွေးမျိုးများ တစ်ပည့် သားမြေးများသည်လည်း သေဘေးမှဝေးသည့်အပြင် နေရာကောင်းများရရှိပြီး မိသားစုများပါမကျန် တိုက်တာအိမ်ကားများနှင့်ကြီးပွါးချမ်းသာနေကြသည် ကိုတွေ့ရမည်ဖြစ်ပါသည်။ အသက်စွန့်ပြီး တိုက်ပွဲဝင်နေကြသည်ဆိုသည့် အရာရှိငယ် နှင့် စစ်သည်များ၏ မိသားစုများအတွက် ကတော့ နေစဉ်ဘုရားရှေ့မှာ အသက်ဘေးအန္တရယ် ကင်းဝေးစေကြောင်းဆုတောင်းနေရမှာပါ။
ယနေ့တပ်မတော်အတွင်းလက်ရှိစစ်ဘက်ရာထူးယူထားသော ဗိုလ်ချုပ်ကြီး များကိုလေ့လာကြည့်ပါ။ ကာကွယ်ရေးဦးစီးချုပ် က အစ လက်အောက်ဗိုလ်ချုပ်တွေ ၏ စစ်ရေးစွမ်းရည်သည် သုည ဟုပြောရပါမယ်။ ဖြတ်သန်းလာခဲ့သော ငယ်စဉ်စစ်အရာရှိဘဝကို လေ့လာကြည့်မည်ဆိုလျှင် အားလုံးနီးပါးသည် ကိုယ်ရေးအရာရှိ လုံခြုံရေးအရာရှိ ဦးစီးအရာရှိ အစရှိသည့် လူကြီးအနီးကပ်ပြီးနေသူများပါသည်။ ထူးထူးချွန်ချွန် တိုက်ပွဲဝင်ခဲ့သည့်ပုဂ္ဂိုလ်မျိုး တစ်ဦးတစ်ယောက်မှတွေ့ရမည်မဟုတ်ပါ။ ဒီလိုစစ်ခေါင်းဆောင်တွေ က အတွေးအခေါ်လဲမရှိ အမျော်အမြင်လဲမရှိ အထက်ကခိုင်းတာဘဲဆိုပြီး စစ်တပ်ကို အသုံးချနေမည်ဆိုရင် တပ်မတော်အတွင်း မုဆိုးမ နှင့် ဖခင်မဲ့ သားသမီးများ တစ်နေ့တစ်ခြားများလာမည်သာဖြစ်သည်။  မစွမ်းမသန်    ဒုက္ခိတ များတပ်မတော်အတွင်းပိုများလာမည်သာဖြစ်သည်။    မစွမ်းမသန်    ဒုက္ခိတ ဖြစ်ပြီးရင်လဲ မစွတ်မပွတ် နစ်နာကြေးပေးပြီး တပ်ကထုတ်ခံရ ကူညီမည့်သူမရှိရင် လမ်းဘေးရောက်ပြီး တောင်းစားရသည့်ဘဝမျိုး ရောက်နေတာတွေ အများကြီးတွေ့နေရပါသည်။
ယခုလိုထောက်ပြနေလို့ စာရေးသူကိုစစ်ခေါင်းဆောင်ကြီးတွေ က တပ်ကိုဖြိုခွဲတယ်လို့စွပ်ဆွဲပါလိမ့်မည်၊ တစ်ကယ်တော့ ဒါတွေဟာအမှန်တရားဆိုတာငြင်းလို့မရပါဘူး၊ စစ်သားဆိုတာ ကိုယ့်နိုင်ငံ ကိုယ့်လူမျိုး ကိုယ့်ဘာသာ အတွက် ဒုက္ခိတ ဖြစ်ပါစေ နောက်ဆုံး အသက်စွန့်ဖို့ ထိဖြစ်လာရင်တောင် စွန့်ဖို့အတွက် သစ္စာဆိုထားသူုတွေပါ။ အခု တိုက်ခိုက်သတ်ဖြတ်နေရ တာက ကိုယ့်တိုင်းရင်းသားချင်းပါ တရုပ်တွေ ကုလားတွေ မဟုတ်ပါဘူး။ အဓိပ္ပါယ်မဲ့ သည့်စစ်ပွဲတွေဖြစ်လို့ထောက်ပြနေရတာပါ။ မတရားသည့်စစ်ပွဲတွေကို စစ်သည်တို့အနေဖြင့်လက်မခံဘို့တိုက်တွန်းနေရတာပါ။ ကချင်ပြည်နယ်  ကျောက်စိမ်းတွင်း၊ သစ်တော၊ မြစ်တွေရေကာတာပိတ်ပြီးလျှပ်စစ်ဓါတ်အား ကရင်ပြည်နယ် ရှမ်းပြည်နယ် သတ္တုမိုင်း သစ်တော တွေကရသည့်   ပြည်သူ့ဘဏ္ဏာတွေဖြင့် ဝယ်လို့ရခဲ့သည့် စစ်လက်နက်ကြီးတွေအမြောက်ကြီးတွေ နဲ့ တိုင်းရင်းသား ကချင် ကရင် ရှမ်း လက်နက်ကိုင်တွေကိုတိုက်ခိုက်နေတာကတော့ စစ်အာဏာရှင်တို့ရဲ့ အပြောတစ်မျိုး အလုပ်တစ်မျိုး နဲ့ စစ်တပ်ကိုနံမည်ပျက်အောင် အသုံးချနေတာကိုတွေ့ရမည်ဖြစ်ပါသည်။
စာရေးသူကိုယ်တိုင် ကရင် ခေါင်းဆောင် စောဘိုမြ ၊ ကချင်ခေါင်းဆောင် ဦးဇော်မိုင် ၊ မွန် ခေါင်းဆောင် နိုင်ရွှေကျင် တို့နှင့်ရင်းရင်းနှီးနှီး စကားပြောဆိုခဲ့ဘူးပါသည်။ ပြည်တွင်းစစ်ကြောင့် အဓိပ္ပါယ်မဲ့ သေဆုံးခဲ့ကြရသည့် အလောင်းတွေကို ဆက်လိမ့်မည်ဆိုရင် မြန်မာနိုင်ငံ တောင်ဖက်ခြမ်းကမြောက်ဖက်ခြမ်း အထိဆက်နေလောက်ပြီ ဒီလိုအဓိပ္ပါယ်မဲ့သည် ကိစ္စတွေကိုရပ်စဲပြီး ငြိမ်းငြိမ်းချမ်းချမ်း ဖြစ်ဘို့အတွက် စကားပြောဘို့ အချိန်ရောက်ပြီလို့ သူတို့၏ခံယူချက်ကိုစာရေးအားပြောပြခဲ့ဘူးပါသည်။ တိုင်းရင်းသား ခေါင်းဆောင်ကြီးများ၏ ခံစားချက်တစ်ခုမှာ ပင်လုံစာချုပ်မှသည် ခေတ်အဆက်ဆက်မြန်မာအစိုးရများသည် တိုင်းရင်းသားများအပေါ်တွင် လိမ်ညာခဲ့သည်ဟုခံစားချက်အသီးသီးရှိကြပါသည်။ လက်ရှိအခြေအနေအရ ကြည့်မည်ဆိုလျှင်လဲ ၄င်းတို့ပြောသည့်အတိုင်းဖြစ်နေသည်ကိုတွေ့နေရပါသည်။ အစိုးရအသစ်နှင့် နိုင်ငံရေး ကိစ္စ လက်နက်ကိုင်ဆောင်ရေးကိစ္စ ဆွေးနွေးသည် ဟုဆိုသောဂတိကို အစိုးရဘက်မှချိုးဖေါက်ပြီး နယ်ခြားစောင့်တပ် လုပ်ဘို့အတင်းအားဓမ္မလုပ်ရာမှ ယခုလိုတိုက်ပွဲတွေဖြစ်လာကြတာပါ ဒါကြောင့်တရားခံဟာ စစ်အာဏာရှင်တို့သာဖြစ်ပါသည်။
တပ်မတော်သားတွေ နှင့် တိုင်းရင်းသားလက်နက်ကိုင်အဖွဲ့ဝင်တွေကို တင်ပြချင်တာက နှစ်ဘက်အဖွဲ့ဝင်တွေ သည် တိုင်းတစ်ပါးသားတွေမဟုတ်ကြပါ တစ်မြေတည်းနေတစ်ရေတည်းသောက်နေကြသည့် တိုင်းရင်းသား ညီအစ်ကိုမောင်နှစ်မတွေပါ ဘယ်သူသေသေ  မကောင်းပါ။ စစ်အာဏာရှင်စနစ်၏အမွေဆိုးကြောင့်သာ တစ်ဦး နှင့်တစ်ဦးသတ်ဖြတ်နေကြရတာပါ။ တစ်ဖက်နှင့်တစ်ဖက် နားလည်မှုပေးနိုင်ဘို့အဓိကလိုပါသည်။ အောက်ခြေ စစ်သည်ချင်းတစ်ဦးနှင့်တစ်ဦး ရန်သူလိုမဆက်ဆံကြတော့ဘူးဆိုရင် ဒီစစ်ပွဲတွေဟာရပ်စဲသွားပါလိမ့်မယ်။ လွန်ခဲ့သော လ ပိုင်းလောက်က တပ်မတော်တပ်ရင်းတစ်ရင်းလုံး ကေအိုင်အေ နှင့် နားလည်မှုရ သွားသည့်အခါ စစ်ခေါင်းဆောင်ကြီးတွေ တပ်ရင်းမှူးကလွဲလို့ မည်သူကိုမျှအရေးမယူဝံ့သည့် ဖြစ်စဉ်တွေရှိခဲ့ပါသည်။ ကချင် ကရင် ရှမ်း လက်နက်ကိုင်တွေကို မေတ္တာရပ်ခံချင်တာကတော့ တပ်မတော် ထဲမှာလည်းတိုင်းရင်းသားတွေ အများကြီးရှိပါသည် လူမျိုးရေးကို ရှေ့တန်းမတင်ဘဲစဉ်းစားဆုံးဖြတ်စေချင်ပါသည် မလွှဲသာ၍ တစ်ဦးနှင့်တစ်ဦး ပစ်ကြခတ်ကြသည်မှလွဲပြီး နားလည်မှုပေးကြဖို့လိုပါသည်။
ပြဿနာအားလုံး၏အဓိကတရားခံ အာဏာရှင်ကြီးများကို မေတ္တာရပ်ခံချင်တာကတော့ တိုင်းပြည်ကို ပြန်ကြည့်ပါ နှစ်ပေါင်းများစွာ ပြည်တွင်းစစ်ကြောင့် စစ်ဘေးစစ်ဒဏ်သင့်ပြီး ပြည်သူပြည်သားတွေဟာ စုတ်ပြတ်သတ်နေပါပြီ ရှိနေသည့် မာန်တွေ မာနတွေ ကို ခဝါချ သင့်နေပါပြီ ရရှိခဲ့ပြီးသား တိုင်းရင်းသားတွေနဲ့ ငြိမ်းချမ်းရေးကို လဲ“ ဝ” ၊ အခါ တို့လို ပြန်လည်သဘောတူသင့်ပါသည်။ မိမိစစ်သည်တွေကိုလည်းပြန်ကြည့်ပါဦး တော်တော်လေးခါးချိနေကြပြီ ပြည်ပနိုင်ငံကိုဒီလိုစစ်ရေးစွမ်းရည်နဲ့ယှဉ်နိုင်ပါ့မလား၊ တရုပ်နိုင်ငံကိုတစ်ကယ်မိတ် တွေအစစ်နိုင်ငံလို့ ဗိုလ်ချုပ်ကြီး တို့မသတ်မှတ်နိုင်ဘူးဆိုတာ နားလည်ပါတယ် ယခု  နိုင်ငံရေးကစားကွက်တွေ အသစ်ဆန်းလာတာကောင်းပါသည် သို့သော်ကိုယ့်တိုင်းရင်းသားတွေကိုတော့ဒီလိုမလုပ်ပါနှင့် စကားပြောကြည့် ပါတစ်ဖက်သတ်မဆက်ဆံပါနှင့် ယုံကြည်မှုရရှိဘို့တော့လိုပါသည်။ သိက္ခာရှိသည့် အစိုးရ လို့ နိုင်ငံတကာမှာ လူရာဝင်ချင်ရင်တော့ ပြည်တွင်းပြည်ပ၏ ယုံကြည်မှုရဘို့လိုပါသည်။ ဘာဖြစ်လို့လဲဆိုတော့ အရင်စစ်အစိုးရ ခေတ်ကလိမ်ခဲ့တာတွေများလို့ဘဲ။ အခုလဲလိမ်နေတုံးဘဲ နိုင်ငံရေးအကျဉ်းသားမရှိဘူး ခလေးစစ်သားမရှိဘူး ဆိုတာ တွေပါ။ သမ္မတကြီးပြောသည့်အတိုင်းလုပ်နိုင်ပါစေလို့ဆန္ဒပြုပါသည်။

၂၀၁၁ ခုနှစ် စက်တင်ဘာ လ ၂၇ ရက်
ဝါရှင်တန်မြို့



No comments:

Post a Comment