Shwe Dagon

Shwe Dagon

Tuesday, February 4, 2014

ဗိုလ်ချုပ်မှူးကြီးမင်းအောင်လှိုင် ထံသို့အိတ်ဖွင့်ပေးစာ

၆၉ နှစ်မြောက် တပ်မတော်နေ့ ဂုဏ်ပြု ကြိုဆိုသောအားဖြင့် သဝဏ်လွှာ

                                         WWW.PHOTAYOKEKING.ORG
 
သို့
ဗိုလ်ချုပ်မှူးကြီး မင်းအောင်လှိုင်
တပ်မတော် ကာကွယ်ရေး ဦးစီးချုပ်
မှ
မျိုးချစ် တပ်မတော်သားများ
ဗိုလ်ချုပ်မှူးကြီး ခင်ဗျား
လက်နက်ကိုင် တိုင်းရင်းသားများနဲ့ စပ်လျဉ်းပြီး ဗိုလ်ချုပ်မှူးကြီးက အပစ်ရပ် ငြိမ်းချမ်းရေးကိုသာ ဦးတည်လိုတယ်၊ တိုင်းရင်းသားတွေရဲ့ အနာဂါတ် ခံစားခွင့်၊ တန်းတူရည်တူ ရပိုင်ခွင့်၊ ဖယ်ဒရယ် အခြေခံ ဥပဒေကို ဥပယ်တမျဉ်နဲ့ လောလောဆယ် မစဉ်းစားနိုင်သေးဘူးလို့ ပြောတာ ကြားသိရပါတယ်။ အလားတူ ၂၀၀၈ အခြေခံ ဥပဒေကို ကာကွယ် စောင့်ရှောက်ရမယ် ဆိုတာကို ထပ်ခါတလဲလဲ ပြောဆိုချက် တွေဟာလည်း ဒီမိုကရေစီ အင်အားစုများနဲ့ လက်နက်ကိုင် တိုင်းရင်းသား အဖွဲ့များအဖို့ စိတ်လက် မသက်မသာ ဖြစ်ဖွယ် ရှိနိုင်ပါတယ်။ KNU ခေါင်းဆောင် ဗိုလ်ချုပ်ကြီး မူတူးနဲ့ တွေ့ဆုံခဲ့စဉ်က TV ဖန်သားပြင်ပေါ်မှာ ဗိုလ်ချုပ်မှူးကြီးရဲ့ နွေးထွေးတဲ့ တုန့်ပြန်မှုတွေဟာ အိမ်မက်ပန်းချီကားလို ဖြစ်သွားတော့မလားလို့ စိုးရိမ်နေရပါတယ်။ ဒီလိုဆိုရင် အတိုက်အခံ အဖွဲ့အစည်းတွေက ယခင် ကျင့်သုံးခဲ့ကြတဲ့ လက်နက်ကိုင် တော်လှန်ခြင်း၊ ဆန္ဒပြတောင်းဆိုခြင်း၊ အစာငတ်ခံ ဆန္ဒပြခြင်း၊ ထိပ်တိုက် ရင်ဆိုင်ခြင်း စတဲ့ Hard Line ကို ရောက်အောင် တွန်းပို့နေသလို ဖြစ်သွားပါတယ်။ တိုင်းရင်းသားတွေရဲ့ ရိုးသားမှု၊ တပ်မတော်အပေါ် ယုံကြည်မှု၊ ရှိရင်းစွဲ ဒီဂရီအမှတ်ကို ဆက်လက် တက်လာဖို့က ဗိုလ်ချုပ်မှူးကြီး အပေါ်မှာ အများကြီး မူတည်ပါတယ်။
အမျိုးသား နိုင်ငံရေး ဦးဆောင်မှု အခန်းကဏ္ဍမှာ တပ်မတော်က ပါဝင်ဆောင်ရွက်ရမယ် ဆိုထားတာကြောင့် နိုင်ငံရေး စစ်မျက်နှာဟာ စစ်ရေး စစ်မျက်နှာထက် ပိုမို ရှုပ်ထွေး အကဲဆပ်နိုင်ပါတယ်။ စစ်သားစိတ်ဖြင့် မြင်နေတာထက် လူသားချင်း စာနာစိတ်ဖြင့် တွေ့ဆုံဆွေးနွေးရေး စားပွဲဝိုင်းကို အောင်မြင်စွာ အကောင်အထည် ဖေါ်သင့်ပါတယ်။ ဒေါ်အောင်ဆန်းစုကြည်နဲ့ တွေ့ဆုံဆွေးနွေးဖို့ ဗိုလ်ချုပ်မှူးကြီး စိတ်ဆန္ဒရှိခဲ့ရင် စေတနာ အရိုးခံဖြင့် သတိပြုစရာများကို အကြံပြု တင်ပြလိုပါတယ်။ ဗိုလ်ချုပ်မှူးကြီးတို့ အဓိက ကိုင်ထားတဲ့ မဟာဗျူဟာဖြစ်သော ဒို့တာဝန် အရေးသုံးပါး ထိခိုက်စေမဲ့ ဖယ်ဒရယ် တောင်းဆိုမှုမျိုးကို လက်ခံမှာ မဟုတ်ဘူးဆိုတာ ဒေါ်အောင်ဆန်းစုကြည် အနေနဲ့ သိထားနှင့်ပြီး ဖြစ်ပါတယ်။ ထိခိုက်စေတဲ့ အချက်အလက်ကို ဗိုလ်ချုပ်မှူးကြီး ထောက်ပြရင်လည်း အကျိုးအကြောင်း မှန်ခဲ့ပါက နောက်ဆုတ်ပြုပြင် လက်ခံပေးမယ်လို့ ယုံကြည်ပါတယ်။ တိုင်းရင်းသား အခွင့်အရေး ခံစားခွင့်၊ တန်းတူရည်တူ ဖြစ်ခွင့်၊ ဖယ်ဒရယ် အခြေခံ ဥပဒေ ပြင်ဆင်ချက်တွေကို နှစ်ဘက် ညှိနှိုင်းရင် ရနိုင်ပါတယ်။ တပ်မတော် ပါဝင်မှု ရာခိုင်နှုန်း ၂၅ % ကို လျော့ချတာမျိုး၊ ပယ်ဖျက်တာမျိုးကို ဗိုလ်ချုပ်မှူးကြီး လက်မခံနိုင်တာ လက်ရှိ အပစ်ရပ်ကိစ္စ မပြီးသေးတာကို ထောက်ရှုပြီး နားလည်ပါလိမ့်မယ်။ ပြည်ခိုင်ဖြိုး ပါတီက တင်လိုက်တဲ့ ဥပဒေ ပြင်ဆင်ချက် တစ်ရပ်ဟာ ဒေါ်အောင်ဆန်းစုကြည်အတွက် မဟုတ်ဘဲ ရန်ကုန်တိုင်း ဝန်ကြီးချုပ် ဦးမြင့်ဆွေအတွက် ဖြစ်နေပါတယ်။ ဒါကြောင့် ဒေါ်အောင်ဆန်းစုကြည်ရဲ့ စွန့်လွှတ်အနစ်နာခံမှုနဲ့ ဗိုလ်ချုပ်အောင်ဆန်း မျက်နှာကို ထောက်ထားသောအားဖြင့် အဲဒီ ဥပဒေ ပြင်ဆင်ချက်အား ဗိုလ်ချုပ်မှူးကြီးက လွတ်လွတ်လပ်လပ် ဖြစ်သွားအောင် ထောက်ခံ ပေးစေလိုပါတယ်။ ဖြစ်နိုင်ပါက NLD ရဲ့ တင်ပြချက်၊ ဥပဒေ ပြင်ဆင်ချက်တွေကို တပ်မတော် အနေနဲ့ အတိုက်အခံ မပြုရင်တောင် ကြားနေတဲ့ အသွင်မျိုး ဖန်တီးပေးစေလိုပါတယ်။ ဗိုလ်ချုပ်မှူးကြီးရဲ့ မေတ္တာစေတနာ ရောင်ပြန်ဟပ်မှု ဧကန် ရရှိပါလိမ့်မယ်။ ဒေါ်အောင်ဆန်းစုကြည်ဟာ တပ်မတော်ကို Professional Army ဖြစ်အောင် အမေရိကန်၊ ဗြိတိန်ရဲ့ ကူညီပံ့ပိုးမှုရအောင် ဆက်သွယ်ရေး ပေါင်းကူးတံတားသဖွယ် တွန်းအားတစ်ရပ် ဖြစ်လာပါလိမ့်မယ်။ ဖခင်ရဲ့ တပ်မတော်အပေါ် သံယောဇဉ် ကြီးမားမှုနဲ့ ဒေါ်အောင်ဆန်းစုကြည်ရဲ့ ရင်ထဲမှာ တစုံတရာ ဆန္ဒရှိတယ်လို့ ယုံကြည်ပါတယ်။
 
ဗိုလ်ချုပ်မှူးကြီး မင်းအောင်လှိုင်
ဗိုလ်ချုပ်မှူးကြီး ခင်ဗျား
မြန်မာ့နိုင်ငံရေး ဇာတ်ခုံဟာ ဂမ္ဘီရဆန်သလို မထင်မှတ်တာတွေလည်း ဖြစ်လာတတ်ပါတယ်။ အနီးစပ်ဆုံး ပြောရရင် ဦးရွှေမန်းကို လိုင်းတင်ထားပြီးမှ ဦးသိန်းစိန်က ငေါက်ကနဲ ပေါ်လာတာတွေ၊ ဦးသီဟသူရ တင်အောင်မြင့်ဦးကို ခိုင်ပြီလို့ ထင်မှတ်ပြီးမှ ပြုတ်ကျသွားတာတွေ၊ ဦးမြင့်ဆွေကို ထပ်ထိုးတင်ဖို့ လိုင်းတင်ထားတာတွေကို တွေ့ရမှာ ဖြစ်ပါတယ်။ ဒီကြားထဲ ဦးတင်အေး၊ ဦးဌေးဦးတို့လို ကော်ကောင်တွေလည်း မထင်မှတ်တဲ့ သူတွေအဖြစ် တက်လာနိုင်ဦးမှာမို့ ခန့်မှန်းရ ခက်ပါတယ်။ ကော်ကောင်ဆိုလို့ ဗိုလ်ချုပ်မှူးကြီးကိုယ်တိုင် ကော်ကောင် ဖြစ်ခဲ့တယ်ဆိုတာ အားမနာတမ်း စမ်းစစ်လိုပါတယ်။ ဦးသန်းရွှေဟာ ဒုဗိုလ်ချုပ်ကြီး သူရမြင့်အောင်နဲ့ ဒုဗိုလ်ချုပ်ကြီး ကိုကိုတို့ကို Line Up ထိုးထားပြီးမှ ချက်ချင်းပယ်ပြီးတော့ ဗိုလ်ချုပ်မှူးကြီးအား အချိန်နီးကပ်နေတာကြောင့် ချက်ချင်း တပ်ချုပ်ရာထူး ပေးလိုက်တာ မှတ်မိပါလိမ့်မယ်။ ဦးသန်းရွှေ တပ်ချုပ် ဖြစ်ကာစ ၁၉၉၂ ခုနှစ်တုန်းက ဗိုလ်ချုပ်မှူးကြီးဟာ G-2 ဗိုလ်မှူးအဆင့်သာ ရှိနေလို့ အဆင့် ကွာခြားလွန်းတာနဲ့အညီ တစ်ဦးနှင့်တစ်ဦး နီးကပ်စွာ ထိတွေ့ဆက်ဆံမှု၊ ရင်းနှီးမှု မရှိနိုင်တာ သိသာပါတယ်။ ယုတ်စွအဆုံး တစ်ပတ်စဉ်တည်း သူငယ်ချင်းဖြစ်တဲ့ ဒုဗိုလ်ချုပ်ကြီး ကိုကိုအား ဒုတပ်ချုပ်နဲ့ ကာချုပ် (ကြည်း) လျာထားခဲ့စဉ်က သူငယ်ချင်း အတူတူ ဖြစ်ရင်တောင် သူက နှာတဖျားသာ ရှေ့ရောက်နေတာ သတိပြုလိုက်ပါတယ်။ ဗိုလ်ချုပ်မှူးကြီးဟာ စစ်ရုံး ကက (ကြည်း) မှာ နေခဲ့တဲ့ အစဉ်အလာရယ်၊ ဇာတာခွင် ကောင်းတာရယ်၊ ကံထတာရယ်ကြောင့် စင်ပေါ် ရောက်လာတာ ဖြစ်ပါတယ်။ ဦးသန်းရွှေ၊ ဦးသိန်းစိန်၊ ဦးရွှေမန်းတို့အပေါ် ဂါရဝတရားတော့ ရှိသင့်ပါတယ်။ ဒါပေမဲ့ စစ်တပ်ရဲ့ အစဉ်အလာဖြစ်တဲ့ အထက်ကို တင်ပြနေရမှု၊ အမိန့်နာခံမှု၊ ကြိုးနီစနစ်နဲ့ စီနီယာ Power ဆိုတဲ့ လောင်းရိပ်တွေကို စစ်တပ်ထဲမှာသာ သုံးသင့်ပြီး နိုင်ငံရေး စစ်မျက်နှာမှာတော့ ဖယ်ရှားဖို့ အချိန်အခါသင့်ပြီ ဖြစ်ပါတယ်။ ဘာကြောင့်လဲဆိုတော့ တပ်ကနေ နယ်ဘက်ကို ကူးပြောင်းသွားတဲ့ ဝန်ကြီးဗိုလ်ချုပ်၊ ဗိုလ်ချုပ်ကြီးတွေ၊ တစညနဲ့ ပြည်ခိုင်ဖြိုးပါတီရောက် ဗိုလ်ချုပ်တွေ စသည်တို့ဟာ တပ်မတော်ကို ကောင်းကျိုးပြန်ပြုတာ အလွန်နည်းပါးပြီး တခါတရံ ပြန်တောင်နင်းတာ တွေ့ရပါတယ်။ ပြည်သူ့လွှတ်တော် အစည်းအဝေး တစ်ခုမှာ ပြည်ခိုင်ဖြိုးပါတီ လွှတ်တော်အမတ် ဗိုလ်မှူးဟောင်းတစ်ဦးက တပ်မတော်ကို ဝေဖန်တာတွေ၊ အမျိုးသား လွှတ်တော်ဥက္ကဋ္ဌ ဗိုလ်ချုပ်ခင်အောင်မြင့် (ငြိမ်း) ကိုယ်တိုင်က တပ်မတော် အရာရှိတွေကို လူရှေ့သူရှေ့ ငေါက်ငမ်းခဲ့တဲ့ ဖြစ်စဉ်တွေ ရှိခဲ့ပါတယ်။
ဗိုလ်ချုပ်မှူးကြီး မင်းအောင်လှိုင်မှ တပ်မတော်နေ့ အခမ်းအနားအပြီး လက်ပြနှုတ်ဆက်ထွက်ခွာစဉ်
တွေ့ဆုံ ဆွေးနွေးရေးဟာ စစ်အာဏာရှင်ရဲ့ လက်သုံးစကား စွပ်စွဲပြောဆိုနေကျ ဖြစ်တဲ့ သစ္စာဖေါက်တာ မဟုတ်ပါ။ အထက်လူကြီးဆိုရာမှာ Personal လူပုဂ္ဂိုလ်အတွက်ဆိုရင် မှန်နိုင်ပေမဲ့ တွေ့ဆုံဆွေးနွေးရေး လုပ်တာဟာ တိုင်းပြည်အတွက် ပိုလို့တောင် သစ္စာရှိတယ်လို့ ခေါ်ရမှာ ဖြစ်ပါတယ်။ အထက်လူကြီးကို ဘုရားတစ်ဆူ ဂူတစ်လုံးလို ကိုးကွယ် ကာကွယ်ဖို့ထက် တိုင်းပြည်အတွက် ယှဉ်လာရင် တိုင်းပြည်ကို ဦးစားပေးသင့်သလို ပိုပြီးလည်း အရေးကြီးလှပါတယ်။ အတိုက်အခံတွေဟာလည်း သူတို့ကို ခုံရုံးတင်ဖို့ ပြောနေတာ မဟုတ်ပါဘူး။ ဒါကြောင့် တပ်နဲ့ပြည်သူ ရင်ကြားစေ့ ပူးပေါင်းနိုင်ရေးအတွက် အဓိက အထောက်အကူဖြစ်တဲ့ ဒေါ်အောင်ဆန်းစုကြည်နဲ့ တွေ့ဆုံ ဆွေးနွေးတာဟာ တပ်မတော်ရဲ့ အကောင်းဆုံး နိုင်ငံရေး ရွေ့ကွက်အဖြစ် နိုင်ငံ သမိုင်းမှာ မော်ကွန်းတင်ရစ်မှာ သေချာကြောင်း တင်ပြလိုက်ရပါတယ်။

No comments:

Post a Comment