Shwe Dagon

Shwe Dagon

Tuesday, October 22, 2013

အမျိုးသားဒီမိုကရေစီအဖွဲ့ချုပ် နှင့် ပြည်ထောင်စုလွှတ်တော် (၂၀၁၂ ခုနှစ် ဧပြီလ ၂၄ ရက် ဝါရှင်တန်ဒီစီမြို့)




အမျိုးသားဒီမိုကရေစီအဖွဲ့ချုပ် နှင့် ပြည်ထောင်စုလွှတ်တော်   
ဆောင်းပါးရှင်၊ အောင်လင်းထွဋ်
စစ်ဗိုလ်ချုပ်တို့အနေဖြင့်  ပြည်တွင်းပြည်ပ နိုင်ငံရေးအကြပ်အတည်းဖြစ်တိုင်း ပြည်တွင်းပြည်ပမှ လေးစားချစ်ခင် သော အမျိုးသားခေါင်းဆောင် ဒေါ်အောင်ဆန်းစုကြည် ကိုချဉ်းကပ်ပြီးမျက်နှာချိုသွေးကာ  နိုင်ငံရေးအမြတ် ထုတ်လေ့ရှိသည်ကို အထူးအထွေမတင်ပြလိုတော့ပါ။ သို့သော်အတိတ်ကသမိုင်းကြောင်းများ ကိုဆင်ချင်ပြီး NLD ဆက်လက်လျောက်လှမ်းနိုင်ရန် စာရေးသူသိရှိခဲ့သမျှတင်ပြအပ်ပါသည်။
၁၉၉၀ ရွေးကောက်ပွဲတွင် ဒေါ်အောင်ဆန်းစုကြည်ကိုအကျယ်ချုပ်ထားပြီး စစ်တပ်ကျောထောက်နောက်ခံပြု  ထားသော တိုင်းရင်းသားစည်းလုံးညီညွတ်ရေးပါတီ (တစည) နိုင်လိမ့်မည် သို့မဟုတ် အပြတ်အသတ်မရှုံးနိုင် ဟုစစ်ဗိုလ်ချုပ်များတွက်ချက်ပြီး လွတ်လွတ်လပ်လပ်ရွေးကောက်ပွဲကျင်းပပေးခဲ့သော်လည်း NLD အပြတ် အသတ်နိုင်ခဲ့သဖြင့် NLD အာဏာရှိလာလျှင်တော့ ဒုက္ခရောက်ရတော့မည်ဟု စစ်ဗိုလ်ချုပ်ကြီးငယ်တို့ စိုးရိမ်ခဲ့ကြပါသည်။ ၁၉၉၀ ရွေးကောက်ပွဲအပြီး စစ်ဗိုလ်ချုပ်ကြီးများအတွင်း ပြဿနာကြီးငယ်များရှိခဲ့ပြီး နောက်ဆုံး ဗိုလ်ချုပ်မှူးကြီးစောမောင်ကို အလစ်အငိုက်ယူ တ်ိတ်တိတ်ဖယ်ရှားခဲ့ပြီး ဗိုလ်ချုပ်မှူးကြီးသန်းရွှေ ဦးဆောင်သော တင်းမာသောဗိုလ်ချုပ်အများစု နေရာယူခဲ့ကြပါသည်။ အာဏာရပြီးမကြာမှီမှာပင် ၁၉၉၃ ခုနှစ်တွင် အမျိုးသားညီလာခံကျင်းပမည်ဟုကြေညာပြီး ၁၉၉၀ ရွေးကော်ပွဲတွင်အမျိုးသားဒီမိုကရေစီအဖွဲ့ချုပ် အနိုင်ရမှုကိုလစ်လျူရှုခဲ့ပါသည်။ထိုနောက် အကျယ်ချုပ်ချထားခြင်းခံနေရသော ဒေါ်အောင်ဆန်းစုကြည် ကို NLD မှ ထုတ်ပယ်ပေးရန်နှင့် NLD အမျိုးသားညီလာခံတက်ရောက်ရေး NLD ခေါင်းဆောင်များအားစည်းရုံးရန် စစ်ထောက်လှမ်းရေးအားတာဝန်ပေးအပ်ခဲ့ပါသည်။ဗိုလ်ချုပ်မှူးကြီးသန်းရွှေ ၏   နိုင်ငံတော်အမျိုးသားနိုင်ငံရေး ဦးဆောင်မှု အခန်းကဏ္ဌတွင် တပ်မတော်ကပါဝင်ထမ်းဆောင်နိုင်ရေး  ဦးတည်ချက်ဖြင့်လက်ရှိဖွဲ့စည်းပုံကို ၁၉၉၃ ခုနှစ်မှစ၍ရေးဆွဲခဲ့ပါသည်။ မရှေးမနှောင်းမှာပင် စစ်ဗိုလ်များနိုင်ငံရေးလမ်းကြောင်းအတွင်းဝင်ရောက်နိုင် ရေး ကြံ့ခိုင်ဖွံ့ဖြိုးရေးအသင်းအသင်းကိုဖွဲ့စည်းခဲ့သည်။ NLDကိုတိုင်းရင်းသားလက်နက်ကိုင်ငြိမ်းချမ်းရေးအဖွဲ့များ အပါဝင်စစ်အစိုးရ၏လက်ကိုင်ဒုတ်များဖြစ်သည့် လူထုလူတန်းစားအဖွဲ့များနှင့် အမျိုးသားညီလာခံအတွင်း ဝိုင်းဝန်းဖိအားပေးပြီး စစ်တပ်ဖြစ်ချင်သောလမ်းကိုလျောက်ခိုင်းခဲ့ပါသည်။ သို့သော် နေအိမ်အကျယ်ချုပ်မှ ဒေါ်အောင်ဆန်းစုကြည်ကိုလွှတ်ပေးခဲ့ရပြီး ၁၉၉၆ခုနှစ်တွင် NLD အမျိုးသားညီလာခံမှထွက်ခဲ့ရပြီးနောက် စစ်အာဏာရှင်တို့ အမျိုးသားညီလာခံကိုရပ်ဆဲခဲ့ရလေသည်။ ထိုအချိန်မှစ၍ NLD နှင့်ဆက်နွယ်သူမှန်သမျှကို နည်းမျိုးစုံဖြင့်ဖိအားပေးရန်နုတ်မိန့်ပေးခဲ့ပြီးNLDကိုမျိုးပြုတ်အောင်ချေမှုန်းခဲ့ကြပါသည်။ ဒေါ်အောင်ဆန်းစုကြည်  ကိုနည်းမျိုးစုံဖြင့်ထိန်းခိုင်းခဲ့ပြီး မရသည့်အဆုံးတွင် ဗိုလ်ချုပ်မှူးကြီးသန်းရွှေ မှနေအိမ်အကျယ်ချုပ်ထားရန်အမိန့် ပေးခဲ့ပါသည်။
၂၀၀၀ ခုနှစ်ပတ်ဝန်းကျင်တွင် မြန်မာ့နိုင်ငံအနေဖြင့် လူ့အခွင့်အရေးချိုးဖေါက်မှု ကလေးစစ်သားအသုံးပြုမှု အားဓမ္မလုပ်အားပေးခိုင်းမှု အတင်းအားဓမ္မနေရာရွှေ့ခိုင်းမှု စစ်သားများအားမုဒိန်းပြုခွင့်လိုင်စင်ပေးမှု ဆွဲချက်များ ဖြင့်ကုလသမဂ္ဂတွင်အရေးယူဆောင်ရွက်ပေးရန် တင်ပြချက်များရှိလာသဖြင့် နိုင်ငံတကာတွင် မြန်မာ့အရေးကိစ္စ သည်ရေးပန်းစားပေါ်လွင်ထင်ရှားလာခဲ့လေသည်။အဆိုပါအရေးကိစ္စကိုလစ်လျူရှုထား၍မရမှန်း စစ်အာဏာရှင်  ကြီးကောင်းကောင်းသိပါသည်။ ထိုစဉ်အချိန်က ကမ္ဘာ့အာဏာရှင်ကြီးများ တစ်ဦးပြီးတစ်ဦး ကျဆုံးနေချိန်လည်း ဖြစ်ပါသည်။ ထို့ကြောင့် ၂၀၀၁ ခုနှစ်မှစ၍ အမျိုးသားခေါင်းဆောင် ဒေါ်အောင်ဆန်းစုကြည် ကို လျှို့ဝှက်ပြန်လည်ချဉ်းကပ်ရန် နှင့် တစ်ပြိုင်တည်းမှာပင်အမေရိကန်ပြည်ထောင်စုအားချဉ်းကပ်ရေး မဟာဗျူဟာ ကို စစ်အာဏာရှင်ကြီးမှ စစ်ထောက်လှမ်းရေးအားတာဝန်ပေးခဲ့ပြန်ပါသည်။ အမေရိကန်ပြည်ထောင်စုတွင် DCI Lobby Group ကို အမေရိကန်ဒေါ်လာသိန်းချီပေး၍ ငှားရမ်းခဲ့သလို အခြားတစ်ဖက်တွင်လည်း မြန်မာပြည်သူလူထုအတွက် ဟုဆိုပြီးခေါင်းစဉ်တပ်ခါ ဗိုလ်ချုပ်မှူးကြီးသန်းရွှေ နှင့် ဒေါ်အောင်ဆန်းစုကြည် တစ်စားပွဲတည်းထိုင် ထမင်းစားသောက်ခဲ့ကြလေသည်။ ၂၀၀၂ ခုနှစ် မြန်မာအစိုးရမှ ကိုယ်စားလှယ် (၂)ယောက်ကို အမေရိကန်ပြည်ထောင်စုသို့စေလွှတ်ခဲ့ပြီးနောက် မေလတွင် ဒေါ်အောင်ဆန်းစုကြည် ကိုနေအိမ်အကျယ်ချုပ် မှပြန်လည်စေလွှတ်ပေးခဲ့ပါသည်။ ထိုကဲ့သို့သော နည်းနာကိုသုံး၍ နိုင်ငံတကာ နှင့် ကုလသမဂ္ဂ ကို မြန်မာ့နိုင်ငံရေး အဆင်ပြေသရောင်ပြသခဲ့ပါသည်။
သို့သော် ဒေါ်အောင်ဆန်းစုကြည် အပေါ်မြန်မာပြည်သူလူထု၏ထောက်ခံမှု အားကိုးမှု ယုံကြည်မှု သည် စစ်အာဏာရှင်ကြီးတွက်စသလို လျော့မသွားဘဲ ပိုလို့သာတိုးလာခြင်းကြောင့် ၄င်း၏အစီအမံ ကြံ့ခိုင်ဖွံ့ဖြိုးရေး၏ အနာဂါတ် အန္တရယ်ရှိလာသည့်အတွက် ဒုဥက္ကဌ နှင့် အတွင်းရေးမှူး ကိုတာဝန်ပေ.ပြီး ဒီပဲရင်းလုပ်ကြံမှုဖြင့် ဒေါ်အောင်ဆန်းစုကြည် ကိုအပြတ်ရှင်းရန် အမိန့်ပေးခဲ့ပါသည်။ သို့သော် ကံအားလျော်စွာ ဒေါ်အောင်ဆန်းစုကြည် အသက်ဘေးမှလွတ်မြောက်ခဲ့ပါသည်။ လုပ်ကြံသောသူတွေကိုအရေးမယူသည့်အပြင် ရာထူးများပင်တိုးပေးခဲ့ပြီး လုပ်ကြံခံရသော ဒေါ်အောင်ဆန်းစုကြည် နှင့် NLD ပါတီဝင်များကိုမူ လုံခြုံရေးအရေဆိုပြီးအကျဉ်းထောင်များတွင် ချုပ်နှောင်ခိုင်းခဲ့ပါသည်။
ဒီပဲရင်းအရေးခင်း သည် နိုင်ငံတကာတွင် ဝိုင်းဝန်းရှုပ်ချခံရသည့်အပြင် အနောက်နိုင်ငံကြီးများ၏ ပြင်းထန်သော ဖိအားပေးမှုများနှင့်စီးပွါးရေးပိတ်စို့မှုများ ဖြစ်လာသောအခါတွင် စစ်အာဏာရှင်ကြီးသည် နိုင်ငံတကာတွင် မျက်နှာမပြရဲတော့ဘဲ ဝန်ကြီးချုပ်တာဝန်ကို ဗိုလ်ချုပ်ကြီးခင်ညွန့် အားတာဝန်ယူစေပြီး လမ်းစဉ် (၇) ရပ်ချမှတ်ပေးကာ နိုင်ငံတကာနှင့်ဆက်ဆံ ရန် နှင့် ဒေါ်အောင်ဆန်းစုကြည် အားချဉ်းကပ်ပြီး အမျိုးသားညီလာခံ တွင် NLD ပါဝင်ရေး စည်ါ်ရုံးခိုင်းခဲ့ပြန်ပါသည်။နိုင်ငံတကာသို့လည်း ကုလသမဂ္ဂအထွေထွေအတွင်းရေးမှူးချုပ်၏ အထူးကိုယ်စလှယ် Mr Razali မှ တစ်ဆင့်အချင်းချင်းနားလည်မှုရသရောင်သတင်းလွှင့်ခြင်းဖြင့် နိုင်ငံတကာကိုအချိုသတ်ခဲ့ပါသည်။တစ်ဖက်တွင်လည်း ပြည်ထဲရေးဝန်ကြီး ဗိုလ်မှူးကြီးတင်လှိုင် ခေါင်းဆောင်သည့်အဖွဲ့နှင့်ဒေါ်အောင်ဆန်းစုကြည်အကြိမ်ကြိမ်တွေ့ဆုံခဲ့ပြီးနောက် နိုင်ငံရေးအကျဉ်းသားများ ပြန်လည်လွှတ်ပေးရေး ၊ ၁၉၉၀ ရွေးကောက်ပွဲအားတစ်နည်းနည်းဖြင့်အသိအမှတ်ပြုပေးရေး ၊ ဖွဲ့စည်းပုံမူကြမ်းပါအခြေခံမူများပြန်လည် ဆွေးနွေးခွင့်ပြုရေး အစရှိသည့်အချက်များကို သဘောတူညီ ရခဲ့ပါသည်။ အဆိုပါ ဆွေးနွေးမှုများကို နေ့စဉ် တာဝန်ခံများမှ ဗိုလ်ချုပ်မှူးကြီးသန်းရွှေ အားတင်ပြပြီးသဘောတူ ညီမှုရယူခဲ့ခြင်းဖြစ်ပါသည်။
၂၀၀၄ ခုနှစ် အမျိုးသားညီလာခံပြန်မစမှီ ရက်သတ္တ တစ်ပတ်အလိုထိ NLD ညီလာခံပြန်တက်ရေးမှာသေချာသ လောက်ဖြစ်ပါသည်။ဗိုလ်ချုပ်မှူးကြီးသန်းရွှေလည်းသဘောတူသည်၊ ဒေါ်အောင်ဆန်းစုကြည်လည်းလက်ခံ ကြေနပ်သည့် အတွက် ၉၅% သေချာသလောက်ရှိသည် ဒီကြားအတွင်းတစ်စုံတစ်ရာအမှားအယွင်းမရှိရန် စကားလုံးအသုံးအနှုန်းကအစသတိထားရန် စစ်ထောက်လှမ်းရေးအတွင်းသတိပေးမှုများရှိခဲ့ပါသည်။သို့သော် ရက်ပိုင်းအလိုတွင် စစ်အာဏာရှင်ကြီးမှနေ၍ တာဝန်ခံများအားခေါ်ယူပြီး “ မင်းတို့ ဒေါ်အောင်ဆန်းစုကြည် ကိုပြောလိုက် NLD အရင်ဆုံးအမျိုးသားညီလာခံကိုတက်ပါ ပြီးမှ နိုင်ငံရေးအကျဉ်းသားများပြန်လွှတ်ပေးဘို့စဉ်း စားပေးမယ်လို့” ပြန်လည်ပြင်ဆင်ပြောခိုင်းခဲ့ပြီးနောက် ဒေါ်အောင်ဆန်းစုကြည် နှင့်အဆင်ပြေရေးပျက်ပြားခဲ့ရ သလို နောက်ဆက်တွဲ ဒေါ်အောင်ဆန်းစုကြည်နှင့်ရင်းနှီးခွင့်ရခဲ့သော ဗိုလ်ချုပ်ကြီးခင်ညွန့် နှင့် စစ်ထောက်ရေး တစ်ဖွဲ့လုံးလည်း ဘဝတွေပျက်ခဲ့ကြရပါသည်။ အမြတ်ရသွားသူကတော့ စစ်အာဏာရှင်ကြီးပါ၊ ထိုကာလအတွင်း ဒီပဲရင်းအရေးအခင်းကြောင့်ရခဲ့သော ဒဏ်ရာဒဏ်ချက်များ ပြည်တွင်းပြည်ပ မှ မေ့ပျောက်သွားစေခဲ့ပါသည်။
ယနေ့ အခြေအနေများကတော့ ယခင်အခင်းအကျင်းများနှင့်မတူတာတွေရှိသလို တူတာတွေလည်းတွေ့နေရပါ သည်။တူတာတွေကတော့ မြန်မာ့နိုင်ငံရေးမှာ ဒေါ်အောင်ဆန်းစုကြည် နှင့် NLD မပါလျှင် မြန်မာ့နိုင်ငံရေး ရှေ့တိုးဘို့မရတာပါဘဲ ဖွဲ့စည်းပုံကြီးဘဲပြပြ လွှတ်တော်ကြီးဘဲပြပြ ပြည်တွင်းပြည်ပကတော့ လက်ရှိအစိုးရ လို့ဘဲခေါ်ခေါ် စစ်ဝတ်ချွတ်အစိုးရလို့ဘဲခေါ်ခေါ် လူလိမ်လူမိုက်တွေလို့ဘဲသတ်မှတ်ကြမှာဖြစ်ပါတယ်။ NLD ၂၀၁၀ ရွေးကောက်ပွဲမဝင်နိုင်အောင် ဒေါ်အောင်ဆန်းစုကြည် ကို အကျယ်ချုပ်ချထားပြီး ကြံ့ခိုင်ဖွံ့ဖြိုးရေးပါတီ နိုင်အောင်ဆောင်ရွက်ခဲ့ပါသည်။ အစိုးရဖွဲ့ခဲ့သော်လည်း နိုင်ငံအချို၏အသိအမှတ်ပြုမှုကိုသာရခဲ့ပြီး လူရာအသွင်း မခံရသည့်အပြင် အိမ်နီးချင်းနိုင်ငံကြီး၏ အနိုင်ကျင့်မှုများကိုပါခံလာရပါသည်။် ဒီအတိုင်းဆက်၍ သွားလျှင် အာရပ်နိုင်ငံများကဲ့သို့ ပြည်သူ၏ဒဏ်ခတ်မှုကိုခံရမှာဖြစ်သလို လူမျိုးစုတိုင်းရင်းသားလက်နက်ကိုင်များအား ဘေးပရောဂများကြောင့် ပြည်ထောင်စုတစ်စိပ်တစ်ပိုင်းပျြိုကွဲသွားနိုင်သည်ကို လက်ရှိအစိုးရတွက်ချက်ခဲ့ပါသည် ထို့ကြောင့် ၂၀၁၁ ခုနှစ် အလည်ပိုင်းလောက်မှ ဒေါ်အောင်ဆန်းစုကြည်ကို တွေ့ဆုံခဲ့ရပါသည်။ ထုံးစံအတိုင်း အစိုးရအခက်အခဲတွေ့လာလျှင် နောက်ဆုံးဂျိုကာ (Joker) ကိုထုတ်သုံးစမြဲသည် စစ်အစိုးရအဆက်ဆက်၏ သီအိုရီပင်ဖြစ်ပါသည်။ ဒါတွေကတော့တူတာတွေပါ။
မတူတာတွေကတော့ ယခင်နှစ်ပေါင်းများစွာထိန်းချုပ်ထားခဲ့သည်တွေထဲက အတော်တန်လွတ်လွတ်လပ်လပ် ပေးခဲ့တာ တွေတွေ့ရပါတယ် အထူးသဖြင့် မီဒီယာတွေပါ။ နိုင်ငံတကာ ဆက်ဆံရေးတွေမှလည်းပွင့်လင်းမှုတွေရှိ လာပါတယ်။ အချို့အမှားတွေကို ခေါင်းဆောင်ပိုင်းတွေ ကိုယ်တိုင်ဝန်ခံလာတာတွေတွေ့ရပါတယ်။ ခေတ်နှင့်အညီနိုင်ငံရေးကစားကွက်များ ပြောင်းသုံးလာတာတွေရှိသလို ဖွဲ့စည်းပုံအခြေခံဥပဒေကိုကိုင်ပြီး ဥပဒေအတိုင်းဆောင်ရွက်နေပါသည်ဆိုပြီးအသံကောင်းဟစ်နေသည်ကိုတွေ့နေရပါသည်။ ပြည်သူအတွက် ခေါင်းစဉ်ဖြင့် ဒေါ်အောင်ဆန်းစုကြည် နှင့် NLD လွှတ်တော်အဝန်းအဝိုင်းတွင်း ဝင်လာအောင် မလိမ့်တပတ် တံခါးလေးအသာဟပေးခဲ့ပြီး အနောက်နိုင်ငံများကိုမြန်မာနိုင်ငံပြုပြင်ပြောင်းလဲနေပါသည် နောက်ပြန်မဆုတ်ပါ ဘူးဟုတစ်ဖက်မှကြွေးကြော်နေသလိုအင်အားကြီးလာသည့်တရုတ်နိုင်ငံသြဇာခံမရောက်ရန် ကူညီဘို့လဲလေသံ ပစ်ခဲ့ပါသည်။
ယခုတော့ မြန်မာအစိုးရ၏နိုင်ငံရေးလှုပ်ရှားမှုကြောင့်ကြံ့ခိုင်ရေးပါတီ စစ်ဝတ်ချွတ်ဗိုလ်ချုပ်ကြီးများ အစိုးရသည် နိုင်ငံတကာမှလည်း ယခင်စစ်ရာဇဝတ်မှုများကိုမေ့ပျောက်ပြီး ချီကျူးထောပနာပြုနေကြသည်ကိုတွေ့နေရပါ သည်။ ဒေါ်အောင်ဆန်းစုကြည် နှင့် NLD အနေဖြင့် ၁၉၉၀ ခုနှစ်ကတစ်ကြိမ် ၊ ၂၀၀၂ ခုနှစ်ကတစ်ကြိမ် ၊ ၂၀၀၄ ခုနှစ်ကတစ်ကြိမ် အလားတူဖြစ်စဉ်များကြုံခဲ့ရပြီးဖြစ်ပါသည်။ ယခုအကြိမ်တွင်လည်း ဗိုလ်ချုပ်မှူးကြီးသန်းရွှေ မဟုတ်သောလည်း ၄င်းလက်သပ်မွေးထားခဲ့သော တစ်ပည့်များသာဖြစ်ပါသည်။ ကလိမ်ကကျစ် ဥာဏ်နီ ဥာဏ်နက်အတွေးအခေါ်တော့ သိပ်ပြောင်းလဲလိမ့်သည်လို့စာရေးသူမထင်ပါ။ ပြီးခဲ့သည့်ကြားဖြတ် ရွေးကောက်ပွဲသည် ဒေါ်အောင်ဆန်းစုကြည် နှင့် NLD အား ပြည်သူ၏ထောက်ခံမှုကို အစိုးရ အားစမ်းကြည့်ခြင်းပါ။ NLD ၄၃ ဦး သည် အကြောင်းမဟုတ်သော်လည်း ၂၀၁၅ ခုနှစ်တွင် ကြံ့ဖွံ့ပါတီ ဒုက္ခရောက်သွားနိုင်သလို စစ်ဗိုလ်ဟောင်းများလည်းအန္တရယ်ရှိလာနိုင်၍ ယခုကတည်းက စကားလုံးအသုံးအနှုံး အကြောင်းပြ၍ ကြိုတင်ကာကွယ်နေခြင်းဖြစ်ပါသည်။
အထက်ပါအကြောင်းအရာများကိုဒေါ်အောင်ဆန်းစုကြည်နှင့်NLDသည် ဆင်ချင်သုံးသပ်ပြီး လက်ရှိအခြေအနေ တွင် အကောင်းဆုံးဖြစ်စေရန်အတွက် ပါတီတွင်းသဘောထားသာမက တိုင်းရင်းသားပါတီများ၊ လက်နက်ကိုင် ငြိမ်းချမ်းရေးအဖွဲ့များ ၊ လွှတ်တော်အတွင်းအပြင် ဒီမိုကရေစီအင်အာစုများ လူထုလူတန်းစားအဖွဲစည်း များ၏အသံကိုလည်း အလေးတယူနားထောင်သင့်ပါသည်။ ထိုပြင်နိုင်ငံတကာ၏ အသံကိုလည်းနားစွံ့ပြီးမှ ဆုံးဖြတ်ချက်ကိုချစေလိုပါသည်။ အားလုံးကတော့ စစ်ဗိုလ်ချုပ်ဟောင်းတွေ ဒီကိစ္စမှာ မရိုးသားဘူးဆိုတာကိုသိ နေကြပါတယ်။ မှန်ကန်သောဆုံးဖြတ်ချက်ကိုချမှတ်နိုင်ပါစေလို့ဆန္ဒပြုလျက်။

ရက်စွဲ၊ ၂၀၁၂ ခုနှစ် ဧပြီလ ၂၄ ရက်
ဝါရှင်တန်ဒီစီမြို့





No comments:

Post a Comment